ព័ត៌មានអន្ដរជាតិ

អតីតនិស្សិតតវ៉ា លោក Boric ក្លាយជាប្រធានាធិបតីឈីលីក្មេងបំផុត

បានផុស

៥ years មុន

នៅ

ថ្ងៃចន្ទ ២០ ធ្នូ ២០២១

ដោយ

បុរសឆ្វេងនិយមបានក្លាយជាប្រធានាធិបតីប្រទេសឈីលីក្មេងបំផុតក្នុងប្រវត្តិសាស្ត្រ បន្ទាប់ពីបានយកឈ្នះគូប្រជែងស្តាំនិយម។

ការបោះឆ្នោតកាលពីថ្ងៃអាទិត្យម្សិលមិញពេលនេះរាប់សន្លឹកឆ្នោតបានជោត៩៧%ហើយ ខណៈលោក Gabriel Boric ទទួលបានសំឡេងគាំទ្រ៥៥.៨%ដែលនាំមុខ១២%លើគូប្រជែងស្តាំនិយម Jose Antonio Kast។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រំលឹកកាលពី១០ឆ្នាំមុន លោក Gabriel Boric គ្រាន់តែជាអ្នកដឹកនាំសិស្សានុសិស្សម្នាក់នៅប្រទេសឈីលី ប្រមូលផ្តុំគ្នាតវ៉ារឿងប្រព័ន្ធអប់រំឯកជនដែលមានសិស្សរាប់ពាន់នាក់ចូលរួមនៅ Santiago។

ឥឡូវនេះសមាជិកសភាអាយុ៣៥ឆ្នាំទទួលបានការចាប់អារម្មណ៍ខ្លាំងពីមហាជនរហូតយកឈ្នះគូប្រជែងដ៏មានឥទ្ធិពលលោក Jose Antonio Kast អាយុ៥៥ឆ្នាំសម្រាប់ការបោះឆ្នោតជ្រើសរើសប្រធានាធិបតីជុំទី២កាលពីថ្ងៃអាទិត្យ។

លោក Boric បានក្លាយជាប្រធានាធិបតីវ័យក្មេងបំផុត និងឆ្វេងនិយមបំផុតនៅក្នុងប្រវត្តិសាស្ត្រនាសម័យកាលទំនើបរបស់ឈីលី។

លោក Boric បានកំពុងដឹកនាំក្រុមសម្ព័ន្ធចម្រុះធំមួយរាប់ទាំងគណបក្សកុម្មុយនិស្ត និងបានឈ្នះពានគំរូសុខមាលភាពរដ្ឋដែលសន្យាដោះស្រាយវិសមភាពសង្គម។ កាលពីខែមុន នៅក្នុងការបោះឆ្នោតជុំទី១ លោកទទួលបានសំឡេងគាំទ្រជិត២៦% ខណៈ លោក Kast ដែលជាអ្នកការពារដ៏រឹងមាំលើសម័យកាលរបស់អតីតមេដឹកនាំផ្តាច់ការឧត្តមសេនីយ៍ Augusto Pinochet ទទួលបានសំឡេងគាំទ្រ២៨% ប៉ុន្តែនៅជុំទី២លោក Boric យកឈ្នះតែម្តង។

សម្រាប់អ្នករិះគន់ថា បុរសវ័យក្មេង Boric ជាបុគ្គលជ្រុលនិយម និងខ្វះបទពិសោធ។ ប៉ុន្តែការរិះគន់ទាំងនោះកំពុងក្លាយជាគុណសម្បត្តិជំរុញឲ្យលោកកាន់ល្បីក្នុងចំណោមយុវជនឈីលី ដែលភាគច្រើនស្គាល់លោកកំឡុងពេលពីរឆ្នាំចុងក្រោយនៃវិបត្តិសង្គម។

ក្នុងខែតុលា ឆ្នាំ២០១៩ ការតវ៉ាដ៏ធំសម្បើមមួយបានកើតឡើងក្នុងប្រទេសនៅពេលមនុស្សរាប់ម៉ឺននាក់ទាមទារឲ្យមានប្រាក់សោធននិវត្តរ៍ប្រសើរឡើង កំណែទម្រង់វិស័យអប់រំ និងការបញ្ចប់ប្រព័ន្ធសេដ្ឋកិច្ចដែលពួកគេជឿថា អនុគ្រោះដល់ក្រុមអ្នកមាន។

ភ្លាមៗនោះ លោក Boric បានក្លាយជាតំណាងដែលមានវោហាសាស្ត្រដ៏មានឥទ្ធិពល និងទាក់ទាញអ្នកគាំទ្រក្នុងចលនាសង្គម ព្រមទាំងធ្វើឲ្យភាពដឹកនាំរបស់លោកត្រូវបានប្រឆាំងដោយក្រុមសម្ព័ន្ធចម្រុះកណ្តាល-ស្តាំនិយមដែលត្រូវបានបង្កើតឡើងពីឆ្នាំ១៩៩០ដល់២០១០។

ចលនានោះបាននាំឲ្យប្រធានាធិបតីផុតអាណត្តិលោក Sebastian Pinera យល់ព្រមលើប្រជាមតិមួយដើម្បីផ្លាស់ប្តូរវិសោធកម្មរដ្ឋធម្មនុញ្ញដែលបន្សល់ទុកពីរបបផ្តាច់ការហូរឈាមរបស់លោក Pinochet។ កាលពីឆ្នាំមុន ពលលរដ្ឋឈីលីភ្លូកទឹក-ដីបោះឆ្នោតគាំទ្រលើសេចក្តីព្រាងផ្លាស់ប្តូរនេះ។ ផែនការនោះឥឡូវនេះបានដំណើរការដែលរដ្ឋធម្មនុញ្ញថ្មីនឹងត្រូវបានបោះឆ្នោតនាពាក់កណ្តាលឆ្នាំ២០២២។

ទម្រង់នយោបាយរបស់លោក Boric កំពុងទទួលបានការចាប់អារម្មណ៍ខ្លាំងពីមហាជន ក្នុងនោះមានសំណើរសម្រាប់ប្រព័ន្ធសុខាភិបាលសាធារណៈរួមបញ្ចូលកាន់តែច្រើន លុបបំបាត់បំណុលរបស់សិស្ស បង្កើនពន្ធសម្រាប់ទ្រព្យសម្បត្តិរបស់អ្នកមាន និងការកែប្រែប្រព័ន្ធសោធនឯកជនរបស់រដ្ឋដែលបន្សល់ទុកពីរបបយោធារបស់លោក Pinochet ជាដើម៕

ប្រែសម្រួល៖ វីរបុត្រ
ប្រភព៖ theguardian

Related Topics:ប្រទេសឈីលី