ចិនកាន់តែធ្ងន់ធ្ងរ ពេលនេះបិទក្រុងមួយទៀត មនុស្ស៥លាននាក់បន្ថែម ត្រូវជាប់ក្នុងផ្ទះ (មានវីដេអូ)

ទីក្រុងមួយទៀតរបស់ចិនត្រូវបិទខ្ទប់ ដោយបង្ខំឲ្យមនុស្សចំនួន៥លាននាក់បន្ថែមទៀត ជាប់នៅក្នុងផ្ទះរបស់ពួកគេ ខណៈប្រទេសកំពុងប្រយុទ្ធប្រឆាំងនឹងការរាតត្បាតនៃជំងឺកូវីដ១៩។

ទីក្រុង Anyang ក្នុងខេត្ត Henan ត្រូវបានបិទខ្ទប់ បន្ទាប់ពីរកឃើញករណីមួយចំនួន។

វីរុសបំប្លែងខ្លួន អូមីក្រុង ដែលរីករាលដាលយ៉ាងឆាប់រហ័ស បានបង្កជាបញ្ហាប្រឈមថ្មីចំពោះប្រទេសចិន ដោយករណីចំនួនពីរនៅ Anyang គឺផ្សារភ្ជាប់ទៅនឹងចង្កោមឆ្លង ដែលកំពុងកើនឡើងនៅក្នុងទីក្រុងភាគខាងជើង Tianjin។

ទីភ្នាក់ងារព័ត៌មានរដ្ឋ Xinhua បានរាយការណ៍ថា អាជ្ញាធរក្នុងទីក្រុង Anyang បានប្រកាសពីការបិទខ្ទប់កាលពីល្ងាចថ្ងៃចន្ទ ដោយបានចេញសេចក្តីជូនដំណឹងមួយ បញ្ជាពលរដ្ឋមិនឲ្យចាកចេញពីផ្ទះរបស់ពួកគេ ឬបើកបរយានយន្តនៅលើដងផ្លូវឡើយ។

ទីភ្នាក់ងារព័ត៌មានដដែលបានរាយការណ៍ទៀតថា អាជីវកម្មមិនសំខាន់ទាំងអស់ និងសាលារៀនត្រូវបានបិទ ហើយការធ្វើតេស្តទ្រង់ទ្រាយធំបានចាប់ផ្តើម ដើម្បីឆ្លើយតបទៅនឹងស្ថានភាពគ្រប់គ្រងរោគរាតត្បាតធ្ងន់ធ្ងរ និងទប់ស្កាត់ការរីករាលដាលនៃវីរុសអូមីក្រុង។

មានការឆ្លងក្នុងសហគមន៍ថ្មីចំនួន ៥៨ករណីត្រូវបានរាយការណ៍នៅក្នុងទីក្រុង Anyang ដែលនាំឲ្យករណីសរុបរបស់ទីក្រុងនេះ ឡើងដល់ ៨៤ករណីចាប់តាំងពីថ្ងៃសៅរ៍មក។

ទីក្រុងនេះបានរឹតបន្តឹងការធ្វើដំណើរចេញក្រៅរួចទៅហើយ ដើម្បីធានាថា​ ការផ្ទុះឡើងនឹងមិនរីករាលដាលដល់តំបន់ខាងក្រៅនោះទេ។

យ៉ាងហោចណាស់ទីក្រុងចំនួនបីក្នុងខេត្ត Henan កំពុងប្រយុទ្ធប្រឆាំងនឹងការផ្ទុះឡើងនៃជំងឺរាតត្បាតកូវីដ១៩ ខណៈប្រជាជនចំនួន១៣លាននាក់នៅទីក្រុង Zhengzhou ក្នុងខេត្តនេះ ក៏ប្រហែលជាជាប់ក្នុងការបិទខ្ទប់ទាំងស្រុងផងដែរ។

កាល​ពី​សប្តាហ៍​មុន មនុស្ស​មួយ​លាន​នាក់​នៅទីក្រុង Yuzhou ដែល​ក៏ស្ថិត​ក្នុង​ខេត្ត Henan ផងដែរ ត្រូវ​បាន​គេ​ប្រាប់​ឲ្យ​នៅ​ផ្ទះ។ រីឯទីក្រុង Xi’an ដែលមានប្រជាជន១៣លាននាក់ កំពុងជាប់ក្នុងការបិទខ្ទប់សប្តាហ៍ទី៣៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចិន មិនរស់ជាមួយកូវីដទេ ហើយប្រាប់ឲ្យត្រៀមចាក់វ៉ាក់សាំង ពេញមួយជីវិត