ចិន បញ្ជាក់ជំហររបស់ខ្លួន ក្នុងជម្លោះ រុស្ស៊ី-អ៊ុយក្រែន

រដ្ឋមន្ត្រីការបរទេសចិន លោក Wang Yi បាននិយាយទៅកាន់រដ្ឋមន្ត្រីការបរទេសអាមេរិក លោក Antony Blinken តាមទូរសព្ទកាលពីថ្ងៃសៅរ៍ទី០៥ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈដែល Blinken លើកឡើងថា ទីក្រុងវ៉ាស៊ីនតោនចង់ឲ្យប្រទេសជាច្រើនទៀតដាក់ទណ្ឌកម្មរុស្ស៊ី សម្រាប់ការវាយលុកយោធារបស់ខ្លួនប្រឆាំងនឹងអ៊ុយក្រែន លោក Wang បានព្រមានប្រឆាំងនឹងការប៉ុនប៉ងណាមួយដែលធ្វើឲ្យស្ថានភាពកាន់តែធ្ងន់ធ្ងរឡើង។

យោងតាមក្រសួងការបរទេសអាមេរិក, លោក Blinken បានប្រាប់លោក Wang ថា “ពិភពលោកកំពុងឃ្លាំមើលដើម្បីសង្កេតថាតើ ប្រទេសណាខ្លះក្រោកឈរឡើងដើម្បីគោលការណ៍ជាមូលដ្ឋាននៃសេរីភាព ការប្តេជ្ញាចិត្តដោយខ្លួនឯង និងអធិបតេយ្យភាព ហើយថាពិភពលោកកំពុងធ្វើសកម្មភាពដោយឯកច្ឆន្ទដើម្បីបដិសេធ ហើយ​ឆ្លើយ​តប​នឹង​ការវាយលុក​របស់​រុស្ស៊ី  ដោយ​ធានាឲ្យ​ទីក្រុង​មូស្គូ ទទួលខុសត្រូវ”។

ការសន្ទនានេះបានកើតឡើងអំឡុងពេល លោក Blinken ធ្វើដំណើរទៅកាន់អឺរ៉ុបខាងកើត ក្នុងបំណងបង្ហាញពីការរួបរួមរវាងសហរដ្ឋអាមេរិក និងសម្ព័ន្ធមិត្តណាតូ និងសហភាពអឺរ៉ុប។

ចិននិយាយថា តាំងពីជម្លោះកើតឡើងដំបូង ចិនបានទទូចឲ្យរុស្ស៊ី និងអ៊ុយក្រែនដោះស្រាយគ្នានៅតុចរចា ហើយជំហរនោះនៅតែមិនផ្លាស់ប្តូរឡើយ។ ប្រទេសចិនគាំទ្ររាល់កិច្ចខិតខំប្រឹងប្រែងដែលរួមចំណែកដល់ការកាត់បន្ថយភាពតានតឹង និងការដោះស្រាយនយោបាយ។

លោក Wang ក៏បានប្រាប់លោក Blinken ផងដែរថា សហរដ្ឋអាមេរិក អង្គការណាតូ សហភាពអឺរ៉ុប និងរុស្ស៊ី ចាំបាច់ត្រូវធ្វើការសន្ទនាដោយស្មើភាពគ្នា ជាពិសេសទាក់ទងនឹងការពង្រីកក្រោយសង្គ្រាមត្រជាក់របស់ណាតូ ទៅក្នុងបណ្តាអតីតរដ្ឋនៃកិច្ចព្រមព្រៀងទីក្រុង វ៉ាសូវី ដែលទីក្រុងមូស្គូចាត់ទុកថា ជាការគំរាមកំហែងផ្នែកសន្តិសុខដែលមិនអាចទទួលយកបាន។

ក្រសួង​ការបរទេសចិនបាន​បញ្ជាក់​ថា “​ទីក្រុង​ប៉េកាំង ប្រឆាំង​នឹង​សកម្មភាព​ណា​ដែល​មិន​អំណោយ​ផល​ដល់​ការ​លើក​កម្ពស់​ដំណោះស្រាយ​ការទូត​ ប៉ុន្តែ​ជំនួស​មក​វិញ​នូវ​ការបញ្ឆេះភ្លើង និង​ធ្វើឲ្យ​ស្ថានការណ៍​កាន់តែ​តានតឹង​ឡើង”៕

ប្រែសម្រួល៖ Vann Vann

ប្រភព៖ RT

ចុចអាន៖ តើសង្គ្រាមរុស្ស៊ី-អ៊ុយក្រែន អាចបញ្ចប់ដោយរបៀបណា?