ដើម្បី​​មាន​ពេល​ជា​មួយ​​​គ្រួសារ​ មេ​ដឹក​​នាំ​​ហុងកុង​ លោក​ស្រី​ Lam ​នឹង​​មិន​​ស្វែង​​រក​អាណត្តិទី២

មេដឹកនាំទីក្រុងហុងកុង លោកស្រី Carrie Lam ដែលបានដឹកនាំមជ្ឈមណ្ឌលពាណិជ្ជសកលឆ្លងកាត់រឿងរ៉ាវធ្ងន់ធ្ងរមិនធ្លាប់មានដូចជាការតវ៉ាប្រឆាំងនឹងរដ្ឋាភិបាល និងជំងឺកូវីដ-១៩ បាននិយាយនៅថ្ងៃចន្ទនេះថា លោកស្រីនឹងមិនស្វែងរកការកាន់អំណាចអាណត្តិទី២ដែលមានរយៈពេល៥ឆ្នាំទៀតទេ។

សេចក្តីប្រកាសរបស់លោកស្រី Lam បានកើតមានឡើង ស្របពេលសារព័ត៌មានបានផ្សាយថា រដ្ឋមន្ត្រីនៃគណៈរដ្ឋមន្ត្រី លោក John Lee ដែលជាមន្ត្រីជាន់ខ្ពស់បំផុតលំដាប់ទី២នៅហុងកុងគ្រោងលាឈប់ដើម្បីចូលរួមក្នុងការប្រកួតប្រជែងតំណែងជំនួសលោកស្រី Lam នាខែឧសភាខាងមុខនេះ និង​ដើម្បី​ក្លាយជាមេដឹកនាំបន្ទាប់របស់ទីក្រុងដែលគ្រប់គ្រងដោយចិន។

លោកស្រី Lam បានប្រាប់អ្នកកាសែតថា ៖«មានការពិចារណាតែមួយគត់ នោះគឺគ្រួសារ។ ខ្ញុំបានប្រាប់អ្នករាល់គ្នាពីមុនហើយថា គ្រួសារគឺជាអាទិភាពទី១របស់ខ្ញុំក្នុងការពិចារណា។ ពួកគេគិតថា ដល់ពេលសម្រាប់ខ្ញុំទៅផ្ទះហើយ»។

លោកស្រី Lam ដែលកើតនៅហុងកុងអំឡុង​ចក្រភពអង់គ្លេសគ្រប់គ្រងឆ្នាំ១៩៥៧ និងជាមន្ត្រីរាជការជាយូរអង្វែងបានកាន់អំណាចកាលពីឆ្នាំ២០១៧ជាមួយនឹងការសន្យានាំ​មក​នូវ​ការ​រួបរួមគ្នាដែលកាន់តែមានការអាក់អន់ចិត្តពីការក្តាប់តឹងរបស់ទីក្រុងប៉េកាំង។

រយៈពេល២ឆ្នាំក្រោយមក មនុស្សរាប់លាននាក់បានចេញតវ៉ាតាមដងផ្លូវ។ ពេលខ្លះការតវ៉ាប្រឆាំងរដ្ឋាភិបាលបានផ្ទុះហិង្សាដែលទីបំផុតនាំឲ្យទីក្រុងប៉េកាំងដាក់ចេញច្បាប់សន្តិសុខជាតិក្នុងខែមិថុនា ឆ្នាំ២០២០៕

ប្រែសម្រួល៖ វីរបុត្រ
ប្រភព៖ reuters