Pornhub លុបវីដេអូជាង១០លានដោយសារហេតុផលមួយនេះ

គេហទំព័រ Pornhub បានលុបចោលមាតិកាទាំងអស់ដែលបាន Upload ដោយអ្នកប្រើប្រាស់ដែលមិនបានផ្ទៀងផ្ទាត់ពោលគឺស្មើនឹងប្រហែលជា៨០ភាគរយនៃវីដេអូសរុបរបស់ខ្លួនបន្ទាប់ពីមានការចោទប្រកាន់ថា វាមានផ្ទុកមាតិការំលោភបំពានលើកុមារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូជាង១០លានត្រូវបានលុបចោលជាផ្នែកមួយនៃការបោសសម្អាតរបស់គេហទំព័រអាសអាភាសដែលគ្រប់គ្រងដោយប្រទេសកាណាដាមួយនេះបន្ទាប់ពីមានការចោទប្រកាន់ថា ខ្លួនមានកំហុសជាមួយនឹងវីដេអូនៃការរំលោភបំពាននិងការរួមភេទជាមួយកុមារមិនទាន់គ្រប់អាយុ។

តាមការកត់សម្គាល់ដោយ Motherboard បានបង្ហាញថា មានវីដេអូចំនួន១៣.៥លាននៅលើគេហទំព័រ Pornhub នៅល្ងាចថ្ងៃអាទិត្យប៉ុន្តែចំនួនសរុបមានត្រឹមតែ២.៩លានប៉ុណ្ណោះគិតត្រឹមម៉ោងបាយថ្ងៃត្រង់ថ្ងៃអង្គារ។

គេហទំព័រនេះបាននិយាយនៅក្នុងសេចក្តីថ្លែងការណ៍មួយថា ខ្លួនមិនអត់អោនចំពោះមាតិកាណាដែលបង្ហាញពីការរំលោភបំពានផ្លូវភេទលើកុមារទេនិងបានបដិសេធថាខ្លួនមិនអនុញ្ញាតឲ្យមានរូបភាពបែបនេះឡើយ។

រឿងនេះបានកើតឡើងបន្ទាប់ពី Mastercard និង Visa បានបញ្ឈប់ការទូទាត់លើ Pornhub កាលពីសប្តាហ៍មុនបន្ទាប់ពីមានការចោទប្រកាន់នេះ។

Pornhub គឺជាគេហទំព័រដែលត្រូវបានគេចូលមើលច្រើនជាងគេបំផុតលំដាប់ទី១០នៅលើពិភពលោក។

គេហទំព័រនេះគ្រប់គ្រងដោយក្រុមហ៊ុនមេ MindGeek ដែលជាក្រុមហ៊ុនផលិតរូបភាពអាសអាភាសមានមូលដ្ឋាននៅទីក្រុង Montreal ប្រទេសកាណាដា។ MindGeek ក៏ជាម្ចាស់គេហទំព័រមនុស្សពេញវ័យដ៏ពេញនិយមផ្សេងទៀតរួមមាន YouPorn និង RedTube ផងដែរ៕

ប្រែសម្រួលដោយ៖ Vann Vann

ប្រភព៖ Daily Mail