រុស្ស៊ី វាយដណ្តើមបានទីក្រុងទី១ ក្នុងការលុកលុយដំណាក់កាលថ្មី (មានវីដេអូ)

កងកម្លាំងរុស្ស៊ី បានដណ្តើមយកទីក្រុង Kreminna នៅភាគខាងកើតអ៊ុយក្រែន ហើយកងទ័ពអ៊ុយក្រែន បានដកថយចេញពីទីក្រុងនេះហើយ។

Kreminna ដែលមានប្រជាជនជាង ១៨ ០០០នាក់មុនសង្រ្គាមជាមួយរុស្ស៊ី បានក្លាយជាទីក្រុងដំបូងគេដែលត្រូវបានបញ្ជាក់ថា កាន់កាប់ដោយកងកម្លាំងរុស្ស៊ី ចាប់តាំងពីពួកគេ បើកការវាយលុកថ្មីនៅក្នុងតំបន់ Donbas ភាគខាងកើតប្រទេសអ៊ុយក្រែន។

លោក Serhiy Gaidai អភិបាលតំបន់ Luhansk បានប្រាប់សន្និសីទសារព័ត៌មានមួយកាលពីថ្ងៃអង្គារទី១៩ខែមេសាថា “ទីក្រុង Kreminna ស្ថិតនៅក្រោមការគ្រប់គ្រងរបស់រុស្ស៊ី។ ពួកគេបានចូលទៅក្នុងទីក្រុងហើយ។ អ្នកការពាររបស់យើង ត្រូវតែដកថយ។ ពួក​គេ​បាន​ពង្រឹង នៅតាមទីតាំងថ្មីៗនិង​បន្ត​ប្រយុទ្ធ​ជាមួយ​កងទ័ព​រុស្ស៊ី”។

ទោះបីជាយ៉ាងណាក៏ដោយ លោក​មិន​បាន​និយាយ​ថា​តើ​ពេល​ណា​ដែល​កង​កម្លាំង​រុស្ស៊ី​ដាក់​ការ​គ្រប់​គ្រង​លើទីក្រុង Kreminna នោះ​ទេ ប៉ុន្តែ​​និយាយ​ថា ​ពួកគេ​បាន​វាយ​លុក​ពី​គ្រប់​ទិសទី។

លោកបន្តថា “វាមិនអាចទៅរួចទេ ក្នុងការគណនាចំនួនអ្នកស្លាប់ក្នុងចំណោមប្រជាជនស៊ីវិល។ យើងមានស្ថិតិថា មនុស្សប្រហែល ២០០នាក់បានស្លាប់ ប៉ុន្តែការពិត អាចមានច្រើនទៀត”។

គួរបញ្ជាក់ជាថ្មីថា រុស្ស៊ី បានចាប់ផ្តើមនូវអ្វីដែលខ្លួនហៅថា “ប្រតិបត្តិការយោធាពិសេស” នៅក្នុងប្រទេសអ៊ុយក្រែន កាលពីថ្ងៃទី ២៤ ខែកុម្ភៈ ហើយបានបដិសេធ កំណត់គោលដៅលើជនស៊ីវិល។

រុស្ស៊ីបានបង្កើនការប្រយុទ្ធរបស់ខ្លួន ដើម្បីគ្រប់គ្រងតំបន់ឧស្សាហកម្មភាគខាងកើតនៃប្រទេសអ៊ុយក្រែនកាលពីថ្ងៃអង្គារ ដោយវាយលុកទីក្រុង និងទីប្រជុំជននៅតាមបណ្តោយសមរភូមិជួរមុខប្រវែងរាប់រយម៉ាយល៍ ក្នុងអ្វីដែលភាគីទាំងពីរបានពិពណ៌នាថាជាដំណាក់កាលថ្មីនៃសង្រ្គាម៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អតីតសមាជិកសភាអ៊ុយក្រែន សុំឲ្យលោក ពូទីន បាញ់អាវុធប្រល័យលោក លើប្រទេសរបស់ខ្លួន