ព័ត៌មានអន្ដរជាតិ

អាមេរិកបង្ហាញតម្លៃជាប្រាក់អំពីគ្រឿងសព្វាវុធទុកចោលនៅអាហ្វហ្គានីស្ថាន

បានផុស

៤ years មុន

នៅ

ថ្ងៃព្រហស្បតិ៍ ២៨ មេសា ២០២២

ដោយ

យោងតាមរបាយការណ៍របស់ក្រសួងការពារជាតិអាមេរិកបានបង្ហាញថា សម្ភារយោធា និងគ្រឿងសព្វាវុធដែលអាមេរិកបន្សល់ទុកនៅប្រទេសអាហ្វហ្គានីស្ថាន បន្ទាប់ពីដកងទ័ពចេញពីប្រតិបត្តិការយោធារយៈពេលពីរទសវត្សរ៍កាលពីខែសីហា ឆ្នាំ២០២១គឺគិតជាប្រាក់ប្រមាណ៧ប៊ីលានដុល្លារអាមេរិក។

តាមខ្លឹមសាររបស់របាយការណ៍ដែលត្រូវបានផ្តល់ទៅសភាបង្ហាញថា សម្ភារវិស័យយោធាឥឡូវនេះស្ថិតក្រោមការគ្រប់គ្រងរបស់តាលីបង់ដែលជាសត្រូវសមរភូមិរបស់អាមេរិកក្នុងរយៈពេលពីរទសវត្សរ៍ចុងក្រោយ។ ក្រសួងការពារជាតិអាមេរិកគ្មានផែនការវិលត្រឡប់ទៅអាហ្វហ្គានូស្ថានវិញទេដើម្បីយក ឬក៏បំផ្លាញចោលសម្ភារយោធាទាំងនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហរដ្ឋអាមេរិកបានផ្តល់សម្ភារយោធាដែលគិតជាប្រាក់សរុប១៨.៦ប៊ីលានដុល្លារអាមេរិកទៅក្រសួងការពារជាតិ និងកម្លាំងសន្តិសុខអាហ្វហ្គានីស្ថាន (ANDSF) ពីឆ្នាំ២០០៥ដល់ខែសីហា ឆ្នាំ២០២១។ នេះបើយោងតាមរបាយការណ៍។

ក្នុងចំណោមសរុបនោះ សម្ភារដែលមានតម្លៃ៧.១២ប៊ីលានដុល្លារអាមេរិកបន្តស្ថិតនៅអាហ្វហ្គានីស្ថាន ក្រោយពេលអាមេរិកបានដកកម្លាំងទ័ពចេញទាំងស្រុងកាលពីថ្ងៃទី៣០ ខែសីហា ឆ្នាំ២០២១។ គ្រឿងសព្វាវុធទាំងនោះមានយន្តហោះចម្បាំង គ្រាប់បែកវាយលើអាកាស កាំភ្លើងធំ រថពាសដែក អាវុធ ឧបករណ៍ទាក់ទង និងសម្ភារយោធាផ្សេងៗទៀត។

តាមរបាយការណ៍និយាយថា ៖«សម្ភារជាច្រើនដែលបន្សល់ទុកនៅអាហ្វហ្គានីស្ថានទាមទារឲ្យមានការថែរក្សាជាពិសេសដែលក្រុមហ៊ុនម៉ៅការ DoD ធ្លាប់បានផ្តល់ទៅកម្លាំងអាហ្វហ្គានីស្ថានក្នុងទម្រង់ចំណេះដឹងបច្ចេកទេស និងឧបត្ថម្ភគាំទ្រ។

របាយការណ៍ចុះខែមីនា ឆ្នាំ២០២២បានបង្ហាញថា ក្រសួងការពារជាតិអាមេរិកតម្រូវឲ្យដាក់របាយការណ៍មួយទៅសភាពាក់ព័ន្ធនឹងការចាត់ចែងទ្រព្យសម្បត្តិ សម្ភារ និងការផ្គត់ផ្គង់របស់អាមេរិកទៅកម្លាំងទ័ពអាហ្វហ្គានីស្ថានដែលត្រូវបានបំផ្លាញចោល យកចេញ ឬរក្សាទុកនៅអាហ្វហ្គានីស្ថាន៕

ប្រែសម្រួល៖ វីរបុត្រ
ប្រភព៖ CNN

Related Topics:សហរដ្ឋអាមេរិក