អ្នកការទូត រុស្ស៊ី ប្រចាំនៅ អាមេរិក រងការគំរាមសម្លាប់

ទីភ្នាក់ងារសារព័ត៌មាន Tass បានដកស្រង់សំដីឯកអគ្គរដ្ឋទូតប្រចាំទីក្រុង Washington DC ដោយបាននិយាយថា អ្នកការទូតរុស្ស៊ី នៅទីក្រុងវ៉ាស៊ីនតោន កំពុងរងការគំរាមកំហែង​ដោយអំពើហិង្សាគំរាមសម្លាប់ ហើយ​ភ្នាក់ងារ​ស៊ើបការណ៍​សម្ងាត់​អាមេរិក ​កំពុង​ព្យាយាម​ទាក់ទង​ជាមួយ​ពួកគេ។

លោក Anatoly Antonov បានប្រាប់ទូរទស្សន៍រុស្ស៊ីថា ចាប់តាំងពីរុស្ស៊ី​បានឈ្លានពាន​អ៊ុយក្រែន​នៅថ្ងៃទី ២៤ ខែកុម្ភៈ កិច្ចប្រជុំទល់មុខជាមួយមន្ត្រីអាមេរិកបានឈប់ ប៉ុន្តែ​ស្ថានទូត​បានក្លាយ​ទៅជា “បន្ទាយ​ដែល​ឡោម​ព័ទ្ធ” ។

សារព័ត៌មាន Tass បានដកស្រង់សម្តីលោកថា “ជាមូលដ្ឋាន ស្ថានទូតរបស់យើង​កំពុង​ប្រតិបត្តិការ​ក្នុង​បរិយាកាសអរិភាព។ បុគ្គលិកស្ថានទូត កំពុងទទួលបានការគំរាមកំហែង រួមទាំង​ការ​គំរាមកំហែង​នៃ​អំពើ​ហិង្សា​លើ​រាងកាយ” ។

យ៉ាងណាមិញ ភ្នាក់ងារមកពីសេវាសន្តិសុខរបស់សហរដ្ឋអាមេរិក កំពុងព្យួរនៅខាងក្រៅស្ថានទូតរុស្ស៊ី ដោយ​ផ្តល់​លេខទូរស័ព្ទ CIA និង FBI ដែលអាចហៅបាន ដើម្បីបង្កើតទំនាក់ទំនង ។

ទន្ទឹមនោះ CIA, FBI, ការិយាល័យនាយកស៊ើបការណ៍ជាតិ និងក្រសួងការបរទេស​សហរដ្ឋអាមេរិក មិន​បាន​ឆ្លើយតបភ្លាមៗ​ ចំពោះ​ការប៉ុនប៉ង​នៃអំពើហិង្សា​នេះទេ៕

ប្រែសម្រួល៖ សាង ស្រីល័ក្ខ

ប្រភព៖ SKY

ចុចអាន៖រុស្ស៊ី ប្រកាសផ្តាច់ភ្លើង មិនឲ្យ ហ្វាំងឡង់ ប្រើ

ចុចអាន៖នាយករដ្ឋមន្ត្រី អង់គ្លេស ថា ទំនាក់ទំនងល្អៗធ្លាប់មានជាមួយលោក Putin គ្មានថ្ងៃវិលទៅដូចដើមឡើយ