ចិន ពន្លះ អាមេរិក ចុកៗ (មានវីដេអូ)

អ្នកនាំពាក្យក្រសួងការបរទេសចិន កាលពីថ្ងៃចន្ទទី១៣ខែមិថុនា បានជំរុញឲ្យសហរដ្ឋអាមេរិក ត្រូវធ្វើសកម្មភាពដូចការនិយាយ កុំបានតែថា រួមទាំងការមិនស្វែងរកការប្រឈមមុខដាក់គ្នា ឬជម្លោះ, មិនស្វែងរកសង្គ្រាមត្រជាក់ថ្មី និងមិនបង្កើតណាតូអាស៊ី ឬតំបន់ដែលបំបែកទៅជាប្លុកអរិភាព ហើយត្រូវឈប់និយាយ ឬធ្វើរឿងដែលអាចបង្កើតការបែកបាក់ និងការប្រឈមមុខដាក់គ្នា។

អ្នកនាំពាក្យ លោក Wang Wenbin បានធ្វើការកត់សម្គាល់បែបនេះ នៅក្នុងសន្និសីទសារព័ត៌មានប្រចាំថ្ងៃ ដើម្បីឆ្លើយតបទៅនឹងសំណួរទាក់ទងនឹងសុន្ទរកថារបស់លោក Lloyd Austin រដ្ឋមន្ត្រីក្រសួងការពារជាតិសហរដ្ឋអាមេរិក នៅឯកិច្ចសន្ទនា Shangri-La។

លោក Wang និយាយថា “តាមរយៈការផ្សព្វផ្សាយព័ត៌មានមិនពិតម្តងហើយម្តងទៀត និងការលាបពណ៌រូបភាពដ៏អាក្រក់លើប្រទេសចិន, សហរដ្ឋអាមេរិកអាចបង្ហាញបន្ថែមទៀតនូវចេតនាអាក្រក់របស់ខ្លួនក្នុងការសាបព្រួសភាពមិនចុះសម្រុង និងលក្ខណៈពិតនៃការអនុវត្តអនុត្តរភាពរបស់ខ្លួន និងការអនុវត្តនយោបាយអំណាច”។

ការគំរាមកំហែងធំបំផុតចំពោះសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ មិនមែនមកពីកន្លែងផ្សេងទេ ប៉ុន្តែគឺជាសកម្មភាពផ្តាច់បះបោររបស់កងកម្លាំង “ឯករាជ្យតៃវ៉ាន់” និងការគាំទ្ររបស់សហរដ្ឋអាមេរិក ចំពោះសកម្មភាពបែបនេះ។

លោក Wang បន្តថា “គឺជាសហរដ្ឋអាមេរិក ដែលមិនពេញចិត្ត និងលាក់បាំងនូវគោលការណ៍ចិនតែមួយ ហើយមិនធ្វើតាមការប្តេជ្ញាចិត្តរបស់ខ្លួន។ គឺជាសហរដ្ឋអាមេរិកដែលកំពុងបន្ធូរបន្ថយការរឹតបន្តឹងលើអន្តរកម្មផ្លូវការរវាងសហរដ្ឋអាមេរិក និងតៃវ៉ាន់ ហើយបង្កើនការលក់អាវុធឲ្យតៃវ៉ាន់ទាំងក្នុងន័យគុណភាព និងបរិមាណ។ នៅតែជាសហរដ្ឋអាមេរិក ដែលបានជួយតៃវ៉ាន់ពង្រីកនូវអ្វីដែលគេហៅថាលំហអន្តរជាតិ ហើយថែមទាំងធ្វើសកម្មភាពដោយបើកចំហរដើម្បីគាំទ្រតៃវ៉ាន់ក្នុងការពង្រឹងអ្វីដែលគេហៅថា ទំនាក់ទំនងការទូត ផងដែរ”។

គោលបំណងរបស់សហរដ្ឋអាមេរិកសម្រាប់សកម្មភាពទាំងនេះ គ្មានអ្វីក្រៅពីការបញ្ជូនសញ្ញាខុសទៅកាន់កងកម្លាំងឯករាជ្យតៃវ៉ាន់ និងធ្វើឲ្យខូចសន្តិភាព និងស្ថិរភាពឆ្លងកាត់ច្រកសមុទ្រនោះទេ។

ដោយកត់សម្គាល់ថា សហរដ្ឋអាមេរិកគឺជាកត្តាដ៏ធំបំផុតដែលជំរុញឲ្យមានការធ្វើទំនើបកម្មយោធានៅក្នុងតំបន់អាស៊ីប៉ាស៊ីហ្វិកនោះ, លោក Wang និយាយថា សហរដ្ឋអាមេរិកបានដាក់ពង្រាយយន្តហោះយោធា និងនាវាចម្បាំងនៅក្នុងសមុទ្រចិនខាងត្បូងជាប្រចាំ ហើយយន្តហោះឈ្លបយកការណ៍របស់ខ្លួនបានក្លែងខ្លួនជាយន្តហោះស៊ីវិលរបស់ប្រទេសដទៃទៀតជាច្រើនដង នៅទីនោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Xinhua

ចុចអាន៖ ចិន ព្រមានបរទេស កុំជ្រៀតជ្រែកបញ្ហាតៃវ៉ាន់ ហើយប្តេជ្ញា ប្រយុទ្ធដល់ទីបញ្ចប់