ប្រទេស ២ ព្រមព្រៀងផ្គត់ផ្គង់ឧស្ម័នទៅ អឺរ៉ុប ជំនួសការនាំចូលពី រុស្ស៊ី

សហភាពអឺរ៉ុបបានយល់ព្រមជាមួយប្រទេសអ៊ីស្រាអែល និងអេហ្ស៊ីបលើកិច្ចព្រមព្រៀងមួយរក្សាស្ថិរភាពការផ្គត់ផ្គង់ឧស្ម័នដល់ប្លុកនេះដើម្បីស្វែងរកជម្រើសជំនួសសម្រាប់ការនាំចូលឧស្ម័នពីប្រទេសរុស្ស៊ី ។

ភាគីទាំងបីបានឈានដល់កិច្ចព្រមព្រៀងនេះនៅរដ្ឋធានី Cairo របស់អេហ្ស៊ីបកាលពីថ្ងៃពុធដើម្បីពង្រឹង​កិច្ចសហប្រតិបត្តិការ​លើ​ឧស្ម័ន​ធម្មជាតិ​ដែល​ចម្រាញ់​ចេញពី​តំបន់​ឧស្ម័ន​​របស់​អ៊ីស្រាអែល​នៅ​សមុទ្រ​មេឌីទែរ៉ាណេ ។

នៅក្រោមកិច្ចព្រមព្រៀងនេះ ឧស្ម័នរបស់អ៊ីស្រាអែលនឹងត្រូវបញ្ជូនទៅអេហ្ស៊ីបតាមបំពង់បង្ហូរប្រេង និងពង្រាវវានៅទីនោះសម្រាប់នាំចេញទៅអឺរ៉ុប ។

ទន្ទឹមនោះប្រធានគណៈកម្មការអឺរ៉ុបលោកស្រី Ursula von der Leyen បានប្រាប់អ្នកយកព័ត៌មានថា អ៊ីស្រាអែល និងអេហ្ស៊ី គឺជា “អ្នកផ្គត់ផ្គង់ដ៏គួរឲ្យទុកចិត្ត” សម្រាប់សហភាពអឺរ៉ុប ខណៈដែលប្លុកមួយនេះព្យាយាមបញ្ចប់ការពឹងផ្អែកលើឥន្ធនៈហ្វូស៊ីលរបស់រុស្ស៊ី ។

បច្ចុប្បន្នទុនបម្រុងឧស្ម័នធម្មជាតិនៅភាគខាងកើតសមុទ្រមេឌីទែរ៉ាណេមានទំហំធំ ហើយប្រទេសក្នុងតំបន់បាននិងកំពុងស្វែងរកកិច្ចសហប្រតិបត្តិការក្នុងមធ្យោបាយមួយចំនួន រួមទាំងផែនការដាក់បំពង់បង្ហូរប្រេងក្រោមបាតសមុទ្រទៅកាន់អឺរ៉ុបផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក បៃដិន ឲ្យប្រទេសផលិតប្រេងមួយនេះបង្កើនទិន្នផល សម្រួលការ កើនឡើងតម្លៃ