ព័ត៌មានអន្ដរជាតិ

មេដឹកនាំ G7, ណាតូ នឹងជួបគ្នាសប្តាហ៍ក្រោយដើម្បីបង្កើនសម្ពាធលើរុស្ស៊ី តាមដានចិន

បានផុស

៤ years មុន

នៅ

ថ្ងៃព្រហស្បតិ៍ ២៣ មិថុនា ២០២២

ដោយ

នៅសប្តាហ៍ក្រោយនេះ មេដឹកនាំក្រុមប្រទេស G7 និងសម្ព័ន្ធមិត្តអង្គការណាតូ នឹងធ្វើការបន្ថែមទៀតដើម្បីបង្កើនការដាក់សម្ពាធលើប្រទេសរុស្ស៊ីជុំវិញការវាយប្រហារលើប្រទេសអ៊ុយក្រែន ហើយក៏ផ្តោតលើកង្វល់កើនឡើងពីប្រទេសចិនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានាធិបតីសហរដ្ឋអាមេរិក ចូ បៃដិន នៅថ្ងៃសៅរ៍នឹងចាកចេញទៅជួបប្រជុំជាមួយមេដឹកនាំ G7 នៅភាគខាងត្បូងប្រទេសអាល្លឺម៉ង់ មុនពេលបន្តដំណើរទៅទីក្រុង Madrid ប្រទេសអេស្ប៉ាញដើម្បីចូលរួមកិច្ចប្រជុំណាតូកំពូល ដែលត្រូវបានគេរំពឹងថា នឹងប្រកាសផែនការថ្មីបន្ថែមទៀតសម្រាប់ការយកចិត្តទុកដាក់របស់ខ្លួនលើតំបន់ភាគខាងកើតអឺរ៉ុប ហើយរដ្ឋាភិបាលទីក្រុងវ៉ាស៊ីនតោននឹងដាក់ចេញផែនការពង្រឹងសន្តិសុខអឺរ៉ុប។

មន្ត្រីជាន់ខ្ពស់អាមេរិកបាននិយាយថា វាជាលើកដំបូង ដែលមានមេដឹកនាំមកពីប្រទេសអូស្ត្រាលី ជប៉ុន កូរ៉េខាងត្បូង និង នូវែលសេឡង់ ចូលក្នុងកិច្ចប្រជុំណាតូកំពូលដែលបង្ហាញគោលបំណងថា សង្គ្រាមនៅអ៊ុយក្រែនមិនបានធ្វើឲ្យប្រទេសលោកខាងលិចឈប់ផ្តោតលើប្រទេសចិនឡើយ។

មន្ត្រីអាមេរិកម្នាក់បាននិយាយថា កិច្ចប្រជុំធ្វើនៅប្រាសាទមួយនៅភាគខាងត្បូងទីក្រុង Munich ថ្ងៃទី២៦-២៧-២៨ ខែមិថុនានេះ មេដឹកនាំ G7 ត្រូវបានគេរំពឹងថា នឹងដោះស្រាយចំពោះការអនុវត្តសេដ្ឋកិច្ចបង្ខិតបង្ខំរបស់ចិន ដែលកាន់តែកើតឡើងខ្លាំងក្នុងរយៈពេលប៉ុន្មានឆ្នាំចុងក្រោយនេះ។

«សង្គ្រាមរបស់រុស្ស៊ីលើអ៊ុយក្រែនបានធ្វើឲ្យភាពជាដៃគូរបស់យើងកាន់តែរឹងមាំជុំវិញពិភពលោក»។ មន្ត្រីបាននិយាយ និងបន្តថា «វាក៏បង្ហាញផងដែរពីរបៀបដែលអ៊ុយក្រែនមិនបានធ្វើឲ្យយើងមើលរំលងចិន»។

តាមពិតទៅ គំនិតយុទ្ធសាស្ត្រថ្មីនឹងត្រូវបានគាំទ្រដោយមេដឹកនាំណាតូនៅពេលពួកគាត់ជួបគ្នានៅទីក្រុង Madrid ប្រទេសអេស្ប៉ាញ នៅថ្ងៃទី២៩-៣០ ខែមិថុនា ដែលនឹងដោះស្រាយការគំរាមកំហែងដែលបង្កឡើងដោយរុស្ស៊ី និងជាលើកដំបូងដោយចិន។

ប្រទេសអាល្លឺម៉ង់ បានដឹកនាំ កិច្ចប្រជុំ G7 ក្នុងឆ្នាំនេះក៏បានអញ្ជើញប្រទេស អាហ្សង់ទីន ឥណ្ឌា ឥណ្ឌូនេស៊ី សេណេហ្គាល់ និងអាហ្វ្រិកខាងត្បូងចូលរួមផងដែរ៕

ប្រែសម្រួល៖ វីរបុត្រ
ប្រភព៖ Reuters