G7 ប្តេជ្ញានៅជាមួយអ៊ុយក្រែន រហូតដល់ទីបញ្ចប់

នៅថ្ងៃទីពីរនៃកិច្ចប្រជុំកំពូលក្នុងប្រទេសអាល្លឺម៉ង់ មេដឹកនាំនៃក្រុមប្រទេសអ្នកមានបំផុតទាំងប្រាំពីររបស់ពិភពលោក បានសន្យាថានឹងគាំទ្រអ៊ុយក្រែនរហូតដល់ទីបញ្ចប់។

ក្នុង​សេចក្តីថ្លែងការណ៍​មួយ G7 ក៏​បាន​និយាយ​ដែរ​ថា រុស្ស៊ី​ត្រូវតែ​បញ្ឈប់​ការ​រារាំង​ស្បៀងអាហារ​មិន​ឲ្យ​ចាកចេញ​ពី​កំពង់ផែ​របស់​អ៊ុយក្រែន។

ថ្លែងសុន្ទរកថានៅក្នុងកិច្ចប្រជុំកំពូលតាមរយៈ Video-Link ប្រធានាធិបតីអ៊ុយក្រែន បានអំពាវនាវសុំអាវុធធុនធ្ងន់បន្ថែមទៀតពីសម្ព័ន្ធមិត្តលោកខាងលិច។

មេដឹកនាំ G7 កំពុងស្ថិតក្រោមសម្ពាធ ឲ្យមានការរួបរួមគ្នាក្នុងវិធីសាស្រ្តរបស់ពួកគេ ប្រឆាំងនឹងការលុកលុយកាន់តែខ្លាំងរបស់រុស្ស៊ី។

មេដឹកនាំបាននិយាយនៅក្នុងសេចក្តីថ្លែងការណ៍យ៉ាងម៉ឺងម៉ាត់មួយកាលពីថ្ងៃចន្ទទី២៧ខែមិថុនាថា “យើងនឹងបន្តផ្តល់ជំនួយផ្នែកហិរញ្ញវត្ថុ មនុស្សធម៌ យោធា និងការទូត ហើយឈរជាមួយអ៊ុយក្រែនឲ្យបានយូរតាមដែលពួកគេត្រូវការ។ យើង​នៅ​តែ​តក់ស្លុត​ ​និង​បន្ត​ថ្កោលទោស​សង្គ្រាម​ឃោរឃៅ គ្មានហេតុផល អយុត្តិធម៌ និង​ខុសច្បាប់​ប្រឆាំង​នឹង​អ៊ុយក្រែន ពីសំណាក់​រុស្ស៊ី និងមាន​ជំនួយ​ដោយ​បេឡារុស”។

មេដឹកនាំ G7 មានកាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និងអាមេរិក បានចូលរួមក្នុងជំនួបកំពូលនៅរដ្ឋបាវ៉ារៀ នៃប្រទេសអាល្លឺម៉ង់។

កិច្ចពិភាក្សាកម្រិតខ្ពស់នេះ ត្រូវបានធ្វើឡើងចំពេល កងកម្លាំងរុស្ស៊ី បង្កើនការវាយប្រហាររបស់ពួកគេលើប្រទេសអ៊ុយក្រែន។

ក្នុងការវាយប្រហារចុងក្រោយបំផុត រុស្ស៊ី បានបាញ់មីស៊ីលដាក់ផ្សារទំនើបមួយកន្លែងក្នុងទីក្រុង Kremenchuk ដោយសម្លាប់មនុស្សចំនួន១៦នាក់ និងជិត៦០នាក់រងរបួស។ អ៊ុយក្រែនប៉ាន់ស្មានថា មានមនុស្សប្រហែល១០០០នាក់ ស្ថិតក្នុងផ្សារទំនើប ពេលរុស្ស៊ីវាយប្រហារ៕

ប្រែសម្រួល៖ Vann Vann

ប្រភព៖ BBC

ចុចអាន៖ ផ្សារទំនើបអ៊ុយក្រែន មានមនុស្ស ១០០០នាក់ រងការវាយប្រហារដោយមីស៊ីលរុស្ស៊ី ខណៈ G7 ថ្កោលទោសខ្លាំងៗ