អាមេរិក បាញ់សាកល្បងមីស៊ីលល្បឿនលឿនជាងសំឡេង តែលទ្ធផលខុស ការរំពឹងទុក

ដោយដកស្រង់សម្ដីពីមន្ត្រីមន្ទីរបញ្ចកោណ, សារព័ត៌មាន Bloomberg បានរាយការណ៍កាលពីថ្ងៃពុធថា ការបាញ់សាកល្បងកាំជ្រួចមីស៊ីលល្បឿនលឿនជាងសំឡេងនៅរដ្ឋហាវ៉ៃរបស់អាមេរិកបានបញ្ចប់ទៅដោយការបរាជ័យ ។

ទន្ទឹមនោះក្រសួងការពារជាតិមិនបានផ្តល់ព័ត៌មានលម្អិតអំពីអ្វីដែលបានកើតឡើងចំពោះការបរាជ័យនេះនោះទេ ដោយគ្រាន់តែបញ្ជាក់ថា មានភាពមិនប្រក្រតីមួយចំនួនបានកើតឡើង បន្ទាប់ពីការបញ្ឆេះម៉ាស៊ីនសាកល្បង ។

ចំណែកអ្នកនាំពាក្យមន្ទីរបញ្ចកោណលោក Tim Gorman បាននិយាយថា “ក្រសួងការពារជាតិមិនអាចបាញ់បង្ហោះមីស៊ីលបានតាមការគ្រោងទុកនោះទេ ហើយយើងក៏កំពុងប្រមូលទិន្នន័យទាំងស្រុងចំពោះទម្រង់នៃការធ្វើតេស្តនេះផងដែរ” ។

ការធ្វើតេស្តនេះគឺជាផ្នែកមួយរបស់ក្រុមហ៊ុន Lockheed Martin ដែលកំពុងអភិវឌ្ឍអាវុធដែលមានសមត្ថភាពហោះហើរក្នុងល្បឿន Mach 5 និងខ្ពស់ជាងនេះសម្រាប់នាវាមុជទឹក និងនាវាលើផ្ទៃទឹក ។

គួរបញ្ជាក់ថា វាមិនមែនជាលើកទី ១ ទេសម្រាប់អាមេរិកក្នុងការបរាជ័យបាញ់សាកល្បងមីស៊ីលរបស់ខ្លួន បន្ទាប់ពីប្រព័ន្ធរ៉ុកកែតមួយប្រភេទបានបរាជ័យក្នុងការបញ្ជូនយានល្បឿនលឿនជាងសំឡេង អំឡុងពេលធ្វើតេស្តនៅឯទីតាំង Pacific Spaceport Complex ក្នុងទីក្រុង Kodiak រដ្ឋ Alaska កាលពីខែតុលា ឆ្នាំ ២០២១ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ អាមេរិក ថា ពូទីន នៅតែចង់ដណ្តើមយកទឹកដី អ៊ុយក្រែន ភាគច្រើន