នាយករដ្ឋមន្ត្រី ប្រទេសអឺរ៉ុបមួយទៀតលាលែងពីតំណែង

យោងតាមការិយាល័យប្រធានាធិបតីអ៊ីតាលីបានឲ្យដឹងថា នាយករដ្ឋមន្ត្រីអ៊ីតាលីលោក Mario Draghi បានដាក់ពាក្យលាលែងពីតំណែងជាផ្លូវការទៅកាន់លោកប្រធានាធិបតី Sergio Mattarella ។

កាលពីសប្តាហ៍មុន លោក Draghi ធ្លាប់បានប្រកាសលាលែងពីតំណែងម្ដងរួចមកហើយ បន្ទាប់ពីសមាជិកម្នាក់នៃសម្ព័ន្ធភាពរួបរួមជាតិរបស់គាត់ គឺចលនាផ្កាយប្រាំ (D5Z) បានបដិសេធមិនចូលរួមក្នុងការបោះឆ្នោតផ្ដល់ទំនុកចិត្តលើរដ្ឋាភិបាល ។

លោក Draghi វ័យ ៧៤ ឆ្នាំដែលជាអតីតប្រធានធនាគារកណ្តាលអឺរ៉ុប បានក្លាយជានាយករដ្ឋមន្ត្រីរបស់ប្រទេសអ៊ីតាលីនៅខែកុម្ភៈ ឆ្នាំ ២០២១ នៅពេលដែលប្រទេសនេះកំពុងតស៊ូជាមួយនឹងអស្ថិរភាពសេដ្ឋកិច្ចកាន់តែធ្ងន់ធ្ងរ ដោយសារជំងឺរាតត្បាតកូវីដ ១៩ ។

ប៉ុន្តែទោះជាយ៉ាងណាក៏ដោយយោងតាមការស្ទង់មតិចុងក្រោយបង្អស់បានបង្ហាញថា ប្រជាជនអ៊ីតាលីភាគច្រើននៅតែចង់ឲ្យលោក Draghi បន្តជានាយករដ្ឋមន្ត្រីរបស់ពួកគេរហូតដល់ការបោះឆ្នោតសកលដែលគ្រោងធ្វើនៅខែឧសភា ឆ្នាំ ២០២៣ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក បញ្ជូនប្រព័ន្ធរ៉ុកកែត HIMARS បន្ថែមទៀតឲ្យ អ៊ុយក្រែន