សេតវិមាន បញ្ជាក់រោគសញ្ញា លោក បៃដិន ក្រោយឆ្លង កូវីដ១៩ (មានវីដេអូ)

សេតវិមានប្រកាសថា លោក ចូ បៃដិន បានធ្វើតេស្តវិជ្ជមាន ជំងឺកូវីដ១៩ ប៉ុន្តែប្រធានាធិបតីសហរដ្ឋអាមេរិករូបនេះ នឹងបន្តធ្វើភារកិច្ច ខណៈចេញរោគសញ្ញាស្រាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន អាយុ ៧៩ ឆ្នាំ នឹងត្រូវធ្វើចត្តាឡីស័កនៅសេតវិមាន។ លោកបានទាក់ទងជាមួយ បុគ្គលិកជាច្រើន ហើយគ្រោងនឹងចូលរួមក្នុងកិច្ចប្រជុំដែលបានគ្រោងទុកនានា។

លោក បៃដិន បាន​និយាយ​ក្នុង​វីដេអូ​ដែល​ថត​នៅ​សេតវិមាន ហើយ​​ចែក​រំលែក​តាម​ប្រព័ន្ធ​ផ្សព្វផ្សាយ​សង្គម​ថា “ខ្ញុំមិនអីទេ ខ្ញុំធ្វើ​ការងារបាន​ច្រើន។ សូមអរគុណអ្នករាល់គ្នា ដែលព្រួយបារម្ភ និងមានជំនឿចិត្ត”។

វេជ្ជបណ្ឌិតរបស់ប្រធានាធិបតីលោក Kevin O’Connor បាននិយាយកាលពីថ្ងៃព្រហស្បតិ៍ទី២១ខែកក្កដា នៅក្នុងលិខិតមួយផ្ញើជូនអ្នកនាំពាក្យប្រធានាធិបតីគឺលោកស្រី Karine Jean-Pierre ថា ការធ្វើរោគវិនិច្ឆ័យរបស់លោក បៃដិន ត្រូវបានបញ្ជាក់ទាំងដោយការធ្វើតេស្តរហ័ស និង PCR។

លោក O’Connor បញ្ជាក់ថា រោគសញ្ញារបស់លោកប្រធានាធិបតីរួមមាន ហៀរសំបោរ និង អស់កម្លាំង ជាមួយនឹងការក្អកស្ងួតម្តងម្កាល។

ស្របពេលជាមួយគ្នានោះ លោកស្រី Jean-Pierre បាននិយាយថា លោក បៃដិន នឹងធ្វើការនៅដាច់ពីគេ រហូតទាល់តែលោកធ្វើតេស្តអវិជ្ជមាន ស្របតាមការណែនាំរបស់សេតវិមាន ដែលតឹងរ៉ឹងជាងការណែនាំពីមជ្ឈមណ្ឌលគ្រប់គ្រង និងបង្កាជំងឺអាមេរិក (CDC) ទៅទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ភ្ញាក់ផ្អើលគ្រប់គ្នា! លោក ចូ បៃដិន និយាយថា ខ្លួនមានជំងឺមហារីក