ប្រទេសសម្ព័ន្ធមិត្ត រុស្ស៊ី ថា ជម្លោះនៅ អ៊ុយក្រែន ត្រូវតែចប់ដើម្បីបញ្ចៀស “សង្គ្រាមនុយក្លេអ៊ែរ”

ប្រធានាធិបតីបេឡារុសលោក Alexander Lukashenko បាននិយាយថា ទីក្រុងមូស្គូ ទីក្រុងកៀវ និងសម្ព័ន្ធមិត្តលោកខាងលិច ត្រូវតែយល់ព្រមបញ្ឈប់សង្គ្រាមនៅអ៊ុយក្រែន ដើម្បីបញ្ចៀស “សង្រ្គាមនុយក្លេអ៊ែរ” ។

លោក Lukashenko ដែលជាសម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ីលោក Vladimir Putin បានប្រាប់ទីភ្នាក់ងារព័ត៌មាន AFP កាលពីថ្ងៃព្រហស្បតិ៍ថា “យើងត្រូវតែបញ្ឈប់សង្គ្រាម ហើយរកដំណោះស្រាយដើម្បីឈានដល់សម្រេចកិច្ចព្រមព្រៀងបញ្ចប់ភាពរញ៉េរញ៉ៃ បញ្ចប់ប្រតិបត្តិការ និងសង្រ្គាមនៅអ៊ុយក្រែន” ។

កន្លងមកមន្ត្រីរុស្ស៊ីបាននិយាយថា ទីក្រុងមូស្គូនឹងអាចប្រើប្រាស់អាវុធនុយក្លេអ៊ែរនៅក្នុងព្រឹត្តិការណ៍ណាមួយដែលខ្លួនកំពុងប្រឈមមុខ ក៏ដូចជាការគំរាមកំហែងដែលមានស្រាប់មកលើប្រទេសរុស្ស៊ី ជាពិសេសសង្គ្រាមនៅអ៊ុយក្រែនតែម្ដង ។

ចាប់តាំងពីពេលនោះមកក្តីបារម្ភជុំវិញការប្រើប្រាស់អាវុធនុយក្លេអ៊ែរបានកើនឡើង ជាពិសេសនៅដើមសង្គ្រាមអ៊ុយក្រែន បន្ទាប់ពីលោក Putin បានដាក់កងកម្លាំងនុយក្លេអ៊ែររបស់រុស្ស៊ីឲ្យមានការប្រុងប្រយ័ត្នខ្ពស់កាលពីថ្ងៃទី ២៧ ខែកុម្ភៈ ពោល ៣ ថ្ងៃ បន្ទាប់ពីការបញ្ជារបស់លោកឲ្យបើកការលុកលុយលើអ៊ុយក្រែន ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក Putin ចាត់ទុកជា “ប្រតិបត្តិការយោធាពិសេស” បានអូសបន្លាយពេលជិត ៥ ខែហើយ ក្រោយផ្ទុះការវាយលុកកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី បាញ់មីស៊ីលល្បឿនលឿនជាងសំឡេងសម្លាប់សកម្មប្រយុទ្ធ អ៊ុយក្រែន ជាង ៦០០ នាក់