លោក វ៉ាង យី ព្រមានថា អ្នកណាក៏ដោយឲ្យតែប្រមាថចិន នឹងទទួលទណ្ឌកម្ម

រដ្ឋមន្ត្រីការបរទេសចិន លោក វ៉ាង យី បានសន្យាថា នឹងដាក់ទណ្ឌកម្មលើអ្នកទាំងឡាយណាដែលប្រមាថដល់ទីក្រុងប៉េកាំង ដែលការប្តេជ្ញានេះ កើតឡើងចំពេល ប្រធានសភាអាមេរិកលោកស្រី Nancy Pelosi បំពេញទស្សនកិច្ចនៅកោះតៃវ៉ាន់។

លោក វ៉ាង បាននិយាយនៅក្រៅកិច្ចប្រជុំ ​រដ្ឋមន្ត្រី​ការបរទេស​អាស៊ាន ក្នុងរាជធានីភ្នំពេញ នៃប្រទេសកម្ពុជា ថា “នេះ​គឺ​ជា​មើលងាយច្បាស់ណាស់។ សហរដ្ឋ​អាមេរិក ​កំពុង​រំលោភ​លើ​អធិបតេយ្យភាព​របស់​ប្រទេស​ចិន ​ក្រោម​រូបភាព​នៃ​អ្វី​ដែល​ហៅ​ថា លទ្ធិ​ប្រជាធិបតេយ្យ។ អ្នកណាដែលប្រមាថ ចិននឹងត្រូវទទួលទោស”។

លោក វ៉ាង ក៏បាននិយាយផងដែរថា ការបង្រួបបង្រួមពេញលេញនៃប្រទេសចិនជាមួយតៃវ៉ាន់ គឺជានិន្នាការទូទៅ និងជាប្រវត្តិសាស្ត្រដែលមិនអាចចៀសបាន។

បន្ថែមពីលើនេះ អ្នកការទូតកំពូលរបស់ចិនរូបនេះ បានព្រមានថា ទីក្រុងប៉េកាំង នឹងមិនទុកឲ្យមានកន្លែងសម្រាប់សកម្មភាពចំពោះកងកម្លាំងឯករាជ្យដែលគាំទ្រតៃវ៉ាន់ ឬការជ្រៀតជ្រែកពីកងកម្លាំងខាងក្រៅឡើយ។

លោក វ៉ាង ក៏បានអះអាងដែរថា ការប៉ុនប៉ងប្រើប្រាស់តៃវ៉ាន់ ដើម្បីទប់ស្កាត់ការអភិវឌ្ឍន៍របស់ចិន គឺនឹងត្រូវវិនាសទៅរកភាពបរាជ័យ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ សេចក្តី ថ្លែងការណ៍ ចេញ ពី រាជធានី ភ្នំពេញ, រដ្ឋមន្ត្រីការបរទេសចិន ថា ដំណើររបស់លោកស្រី Pelosi ទៅតៃវ៉ាន់ គឺ “គ្រោះថ្នាក់ និងឆោតល្ងង់”