ទីផ្សារលក់គ្រឿងសមុទ្រនៅថៃធ្លាក់ចុះ ក្រោយផ្ទុះកូវីដ

អ្នកលក់គ្រឿងសមុទ្រនៅស្រុក Bua Yai និយាយថា ការលក់គ្រឿងសមុទ្របានធ្លាក់ចុះយ៉ាងខ្លាំង បន្ទាប់ពីមានការផ្ទុះឡើងនៃជំងឺកូវីដ ១៩ នៅផ្សារបោះដុំបង្គាក្នុងខេត្ត សាមុត សាខន ។

បរិយាកាសនៅផ្សារក្រុង Bua Yai មានសភាពស្ងប់ស្ងាត់នៅថ្ងៃសុក្រនេះ ជាពិសេសនៅតូបលក់គ្រឿងសមុទ្រតែម្ដង ។

អ្នកលក់គ្រឿងសមុទ្រម្នាក់ឈ្មោះ Chakri Ketmai បានប្រាប់កាសែត Bangkok Post ថា អតិថិជនដែលធ្លាប់ទិញគ្រឿងសមុទ្ររបស់លោកលែងមានវត្តមាន ហើយមានតែហាងអាហារ និងភោជនីយដ្ឋានប៉ុណ្ណោះដែលមានមនុស្សចូលទិញ ។

លោកបាននិយាយថា អតិថិជនភ័យខ្លាចការឆ្លងជំងឺកូវីដ ១៩ ដោយអ្នកខ្លះបានសួរគាត់ថាតើគ្រឿងសមុទ្ររបស់គាត់មកពីណា ។ លោកបានបន្តថា ដើម្បីបង្កើនទំនុកចិត្តលើសុវត្ថិភាពនៃទំនិញរបស់គាត់ គាត់បានសរសេរអក្សរលើស្លាកសញ្ញាមួយថា “គ្រឿងសមុទ្រនៅតូបនេះគឺមកពីខេត្តត្រាត (Trat)” ។

ទន្ទឹមនោះលោកក៏បានប្រាប់អតិថិជនរបស់គាត់ផងដែរថា ផលិតផលរបស់លោកបានឆ្លងកាត់ការត្រួតពិនិត្យដោយមន្ត្រីសុខាភិបាលមកពីក្រុង Bua Yai ដើម្បីធានាថាគ្រឿងសមុទ្ររបស់លោកស្រស់ល្អ មិនមានមេរោគ និងមានសុវត្ថិភាពក្នុងការចំអិន ហើយលោកបានប្រាប់ថារាល់ការទិញគ្រឿងសមុទ្រមកលក់មិនមែនតែក្នុងខេត្ត សាមុត សាខន នោះទេ ។

កាលពីថ្ងៃព្រហស្បតិ៍ប្រធានមន្ទីរជលផលបានធានាអ្នកប្រើប្រាស់ថាវីរុស Covid-19 មិនអាចយកទៅធ្វើជាអាហារសមុទ្របានទេហើយវិធានការណ៍អនាម័យយ៉ាងតឹងរឹងគឺមានសម្រាប់ក្រុមអ្នកនេសាទនិងរោងចក្រកែច្នៃចំណីអាហារក្នុងពេលដោះស្រាយ។

ស្របពេលជាមួយគ្នានេះប្រធានមន្ទីរខេត្តលោក Meesak Pakdeekhong បាននិយាយថា មិនមានសេចក្តីរាយការណ៍ណាមួយអំពីសត្វសមុទ្រឈាមត្រជាក់ដែលត្រូវបានឆ្លងដោយវីរុស Sars ឬ MERs ដែលជាក្រុមគ្រួសារដូចគ្នានឹងជំងឺកូវីដ ១៩ នោះទេ ។

ការលើកឡើងរបស់លោកគឺសំដៅលើការភ័យខ្លាចរបស់អតិថិជនអំពីសុវត្ថិភាពនៃគ្រឿងសមុទ្រ បន្ទាប់ពីការលេចចេញជាថ្មីនៃជំងឺកូវីដ ១៩ ក្នុងផ្សារបោះដុំបង្គា នៅខេត្ត សាមុត សាខន ប្រទេសថៃ ហើយចាប់តាំងពីពេលនោះមកបានរាលដាលដល់ខេត្តផ្សេងទៀតជាច្រើន ។

កាលពីថ្ងៃពុធអាជ្ញាធរសុខាភិបាលខេត្ត Nakhon Ratchasima បានរាយការណ៍ថាប្រជាជនក្នុងតំបន់ចំនួន ៣ នាក់ដែលបានទៅលេងខេត្ត សាមុត សាខន ត្រូវបានគេធ្វើរោគវិនិច្ឆ័យឃើញថាមានជំងឺកូវីដ ១៩ ដែលជាអ្នកលក់គ្រឿងសមុទ្រ ២ នាក់ និងមន្ត្រីម្នាក់នៅក្នុងស្រុក Bua Yai ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ផ្ទុះកូវីដខ្លាំង ម៉ាស់នៅ ភូកេត ឡើងថ្លៃហើយ រកទិញមិនបានទៀត

ចុចអាន ៖ ខណៈករណីឆ្លងផ្ទុះខ្លាំង អ្នកខេត្ត សាមុត សាខន រារាំងអាជ្ញាធរមិនឲ្យបង្កើតមន្ទីរពេទ្យដាក់អ្នកជំងឺកូវីដ