លោក ស៊ី និង ពូទីន នឹងចូលរួមកិច្ចប្រជុំកំពូល G20 នៅកោះបាលី ក្នុងខែវិច្ឆិកា (មានវីដេអូ)

មេដឹកនាំចិន លោក ស៊ី ជីនពីង និងមេដឹកនាំរុស្ស៊ី លោក វ្ល៉ាឌីមៀរ ពូទីន នឹងចូលរួមកិច្ចប្រជុំកំពូល G20 នៅកោះបាលី នាខែវិច្ឆិកា។ នេះបើយោងតាមការឲ្យដឹងនៅថ្ងៃសុក្រទី ១៩ខែសីហានេះ ពីទីប្រឹក្សា ប្រធានាធិបតីឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Andi Widjajanto អតីតលេខាធិការគណៈរដ្ឋមន្ត្រី និងជាទីប្រឹក្សារបស់លោកប្រធានា​ធិបតី Joko Widodo បានប្រាប់ រ៉យទ័រ ថា មេដឹកនាំទាំងពីរ នឹងចូលរួមកិច្ចប្រជុំកំពូលនេះ។

កាលពីថ្ងៃព្រហស្បតិ៍ លោក Widodo ឬគេហៅថា Jokowi បានប្រាប់ Bloomberg News ថា មេដឹកនាំទាំងពីរបានបញ្ជាក់រឿងនេះដល់គាត់។

ទោះបីជាយ៉ាងណាក៏ដោយ ក្រសួងការបរទេសចិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ រ៉យទ័រ ទេ ហើយអ្នកនាំពាក្យវិមានក្រឹមឡាំង ក៏បដិសេធធ្វើអត្ថាធិប្បាយទៅកាន់ Bloomberg ដែរ ប៉ុន្តែមន្ត្រីម្នាក់ទៀតដែលដឹងពីស្ថានភាព បានប្រាប់ទីភ្នាក់ងារសារព័ត៌មានថា លោក ពូទីន គ្រោងនឹងចូលរួមកិច្ចប្រជុំនេះដោយផ្ទាល់។

ដំណើរ​ទស្សនកិច្ច​នេះ​ពិតជា​មាន​សារសំខាន់ ដោយសារតែ​វានឹង​ជា​លើក​ទី​មួយហើយ ដែលលោក ស៊ី ចេញដំណើរទៅ​ក្រៅ​ប្រទេស​ចិន ​ចាប់​តាំង​ពី​ខែ​មករា ឆ្នាំ​២០២០ នៅពេល​លោក​ ​ធ្វើ​ទស្សនកិច្ច​នៅ​មីយ៉ាន់ម៉ា។

មន្ត្រីចិនក៏ត្រូវបានគេរាយការណ៍ផងដែរថា កំពុងរៀបចំផែនការសម្រាប់កិច្ចប្រជុំខែវិច្ឆិកានៅអាស៊ីអាគ្នេយ៍រវាងលោក ស៊ី និងប្រធានាធិបតីអាមេរិកលោក ចូ បៃដិន ដែលក៏ត្រូវបានគេរំពឹងថានឹងចូលរួមកិច្ចប្រជុំ G20 នៅកោះបាលីផងដែរ។

ក្នុងនាមជាប្រមុខ G20 នៅឆ្នាំនេះ, ឥណ្ឌូណេស៊ី បានប្រឈមមុខនឹងសម្ពាធពីបណ្តាប្រទេសលោកខាងលិច ឲ្យដកការអញ្ជើញ លោកពូទីន ជុំវិញការលុកលុយរបស់រុស្ស៊ី លើអ៊ុយក្រែន ដែលរដ្ឋាភិបាលក្រុងមូស្គូហៅថាជា “ប្រតិបត្តិការយោធាពិសេស”។

គួរបញ្ជាក់ថា ប្រទេសឥណ្ឌូណេស៊ី ក៏បានអញ្ជើញមេដឹកនាំអ៊ុយក្រែនលោក Volodymyr Zelenskiy ឲ្យចូលរួមកិច្ចប្រជុំកំពូលនៅកោះបាលីផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ រុស្ស៊ី ប្រាប់លក្ខខណ្ឌដែលខ្លួននឹង បាញ់នុយក្លេអ៊ែរ