​អ៊ីរ៉ង់ ​​គំរាម​កម្ទេច​ អ៊ីស្រាអែល បើហ៊ានវាយប្រហារ​​កម្មវិធី​នុយក្លេអ៊ែរ របស់ខ្លួន (មានវីដេអូ)

ប្រធានាធិបតី​អ៊ីរ៉ង់ ​បាន​គំរាម​កម្ទេច​ប្រទេសអ៊ីស្រាអែល ប្រសិនបើទីក្រុង ហ្ស៊េរុយសាឡិម បើក​ការ​វាយប្រហារ​យោធា ​លើ​កម្មវិធី​នុយក្លេអ៊ែរ​របស់​ក្រុង​ តេហេរ៉ង់។

ចំពេលមានភាពតានតឹង, អ៊ីស្រាអែល ត្រូវគេសង្ស័យថា បានធ្វើការវាយប្រហារជាបន្តបន្ទាប់ សំដៅលើទីតាំងនុយក្លេអ៊ែររបស់អ៊ីរ៉ង់ ក៏ដូចជាអ្នកវិទ្យាសាស្ត្រដ៏លេចធ្លោម្នាក់ផងដែរ។

នៅក្នុងសន្និសីទសារព័ត៌មានដ៏កម្រមួយកាលពីថ្ងៃចន្ទទី២៩ខែសីហា ដែលគម្រប់ខួបមួយឆ្នាំនៃការកាន់តំណែងជាប្រធានាធិបតី, លោក Ebrahim Raisi បាននិយាយថា ប្រសិនបើអ៊ីស្រាអែលសម្រេចចិត្តអនុវត្តការគំរាមកំហែង បំផ្លាញកម្មវិធីនុយក្លេអ៊ែររបស់អ៊ីរ៉ង់មែននោះ ពួកគេនឹងឃើញថា តើអ្វីៗដែលមានពីរបប Zionist នឹងនៅដដែលឬក៏អត់។

លោក Raisi និយាយថា សកម្មភាពរបស់អ៊ីស្រាអែល រួមទាំងការធ្វើឃាតអ្នកវិទ្យាសាស្ត្រនុយក្លេអ៊ែរអ៊ីរ៉ង់ និងសកម្មភាពបំផ្លិចបំផ្លាញ ប្រឆាំងរោងចក្រនុយក្លេអ៊ែរ គឺមិនអាចបញ្ឈប់កម្មវិធីនុយក្លេអ៊ែររបស់អ៊ីរ៉ង់បានទេ។

លោកក៏បានព្រមានដែរថា បើចង់ស្ដារកិច្ចព្រមព្រៀងនុយក្លេអ៊ែររបស់ទីក្រុងតេហេរ៉ង់ ជាមួយមហាអំណាចពិភពលោកឡើងវិញ នោះត្រូវតែឲ្យអ្នកត្រួតពិនិត្យអន្តរជាតិ បញ្ចប់ការស៊ើបអង្កេតរបស់ពួកគេលើភាគល្អិតអ៊ុយរ៉ាញ៉ូម ដែលអះអាងថាបានរកឃើញនៅកន្លែងមិនបញ្ចេញឈ្មោះក្នុងប្រទេស។

អស់រយៈពេលជាច្រើនឆ្នាំមកហើយ ទីភ្នាក់ងារថាមពលបរមាណូអន្តរជាតិ (IAEA) បានជំរុញឲ្យអ៊ីរ៉ង់ ឆ្លើយសំណួរអំពីភាគល្អិតអ៊ុយរ៉ាញ៉ូម ដែលត្រូវបានរកឃើញនោះ។

ទីភ្នាក់ងារចារកម្មអាមេរិក, បណ្តាប្រទេសលោកខាងលិច និង IAEA សុទ្ធតែបាននិយាយថា អ៊ីរ៉ង់បានដំណើរការកម្មវិធីអាវុធនុយក្លេអ៊ែរ ទោះអ៊ីរ៉ង់បានបដិសេដ ខិតខំផលិតអាវុធនុយក្លេអ៊ែរក៏ដោយ។

នៅក្រោមកិច្ចព្រមព្រៀងនុយក្លេអ៊ែរឆ្នាំ២០១៥ ទីក្រុងតេហេរ៉ង់ អាចបង្កើនសារធាតុអ៊ុយរ៉ាញ៉ូមដល់ទៅ៣,៦៧ភាគរយ ហើយរក្សាឃ្លាំងផ្ទុកសារធាតុអ៊ុយរ៉ាញ៉ូមបាន ៣០០គីឡូក្រាម ក្រោមការត្រួតពិនិត្យឥតឈប់ឈរដោយកាមេរ៉ាឃ្លាំមើល និងអធិការរបស់ IAEA។

បន្ទាប់មក អតីតប្រធានាធិបតីអាមេរិក លោក ដូណាល់ ត្រាំ បានដកសហរដ្ឋអាមេរិកជាឯកតោភាគី ចេញពីកិច្ចព្រមព្រៀងនេះក្នុងឆ្នាំ២០១៨ ជាហេតុបង្កឲ្យមានភាពតានតឹងកើនឡើងខ្លាំងក្នុងរយៈពេលប៉ុន្មានឆ្នាំចុងក្រោយនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ៊ីរ៉ង់ នឹង ក្លាយ ជា សមាជិក នៃ អង្គការ កិច្ចសហប្រតិបត្តិការ សៀងហៃ ក្នុង ឆ្នាំ នេះ