វីដេអូ អនុប្រធានាធិបតីអាហ្សង់ទីន ប៊ិះត្រូវខ្មាន់កាំភ្លើងធ្វើឃាត

អនុប្រធានាធិបតីអាហ្សង់ទីនលោកស្រី Cristina Kirchner ប៊ិះនឹងត្រូវជនប្រដាប់អាវុធធ្វើឃាតទៅហើយ នៅជិតផ្ទះរបស់លោកស្រីក្នុងទីក្រុង ប៊ុយណូស៊ែ។

ជនប្រដាប់អាវុធ បានភ្ជង់កាំភ្លើងចំមុខលោកស្រីអនុប្រធានាធិបតី មុនពេលក្រុមមន្ត្រីសន្តិសុខនាំលោកស្រីទៅកន្លែងសុវត្ថិភាព។

ទោះបីជាយ៉ាងណាក៏ដោយ គ្មាន​ការ​បាញ់​ប្រហារ​ណា​មួយកើតឡើងទេ ហើយ​ក្រុមមន្ត្រី​ក៏​មិន​មានរង​របួសអ្វី​ដែរ។

ការប៉ុនប៉ងឆក់យកជីវិតលោកស្រី Kirchner ត្រូវបានថតជាប់ ដោយក្រុមអ្នកសារព័ត៌មានក្នុងស្រុកកាលពីយប់ថ្ងៃព្រហស្បតិ៍ទី០១ខែកញ្ញា ខណៈលោកស្រីកំពុងធ្វើដំណើរឆ្លងកាត់ហ្វូងមនុស្សកកកុញ នៅជិតលំនៅដ្ឋានរបស់ខ្លួន ដោយអ្នកទាំងនោះបានប្រមូលផ្តុំគ្នា ដើម្បីបង្ហាញការគាំទ្រចំពេលមានការកាត់ទោសអំពើពុករលួយ។

ដៃកាន់កាំភ្លើងខ្លី ត្រូវបានគេឃើញនៅពីមុខលោកស្រី។ មានរបាយការណ៍ខ្លះលើកឡើងថា ខ្មានកាំភ្លើងបានបាញ់ខុស ប៉ុន្តែវីដេអូនោះមិនច្បាស់ទេថាតើ ខ្មាន់កាំភ្លើងកេះកៃដែរឬក៏អត់។

មនុស្សម្នាក់ត្រូវបានចាប់ខ្លួននៅនឹងកន្លែង ហើយកាំភ្លើងខ្លីមួយដើម ត្រូវបានប៉ូលិសរកឃើញនៅចម្ងាយប៉ុន្មានម៉ែត្រពីកន្លែងកើតហេតុ។

ប្រព័ន្ធផ្សព្វផ្សាយក្នុងស្រុក អះអាងថា អ្នកវាយប្រហារគឺជាជនជាតិប្រេស៊ីលអាយុ ៣៥ ឆ្នាំ។ ​យ៉ាងណាក្តី ក្រុមមន្ត្រី​មិន​ទាន់​បញ្ជាក់​លម្អិត​អំពី​ជនល្មើស​នៅឡើយ​ទេ។ ជនល្មើសមានប្រវត្តិឧក្រិដ្ឋកម្ម ហើយត្រូវបានចាប់ខ្លួនម្តងហើយកាលពីខែមីនា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ករណី Omicron ទី១នៅ អាហ្សង់ទីន តេស្ត៣ដងទើបរកឃើញ