រុស្ស៊ី ចោទថា ប៉ូឡូញ ជាប់ពាក់ព័ន្ធក្នុងផែនការធ្វើឃាតឧត្តមសេនីយ៍របស់ខ្លួន

កាលពីថ្ងៃសុក្រទី៦ខែកុម្ភៈឆ្នាំ២០២៦ ឧត្តមសេនីយ៍រុស្ស៊ី Vladimir Alekseyev ត្រូវគេប៉ងធ្វើឃាត ​ក្នុងការបាញ់ប្រហារដ៏កក្រើកនៅភាគខាងលិចទីក្រុងមូស្គូ ប៉ុន្តែមិនអាចយកជីវិតមេទ័ពរូបនេះបានឡើយ ខណៈឥឡូវរុស្ស៊ីស៊ើបដឹងថា ប្រទេសប៉ូឡូញក៏ជាប់ពាក់ព័ន្ធក្នុងផែនការធ្វើឃាតនេះដែរ។

តាមការផ្សាយរបស់ RT នៅថ្ងៃចន្ទទី៩ខែកុម្ភៈឆ្នាំ២០២៦ ភ្នាក់ងារចារកម្មរុស្ស៊ី FSB បានទម្លាយព័ត៌មានថា ជនសង្ស័យឈ្មោះ Lyubomir Korba ជាពលរដ្ឋរុស្ស៊ីដើមកំណើតអ៊ុយក្រែន គឺជាអ្នករៀបគម្រោងធ្វើឃាតលោក Alekseyev ហើយក្រោយការវាយប្រហារ រូបគេបានគេចទៅដល់ប្រទេសអារ៉ាប់រួម ប៉ុន្តែត្រូវចាប់ខ្លួនបានរួចបញ្ជូនត្រឡប់មកទីក្រុងមូស្គូវិញកាលពីចុងសប្តាហ៍។

អ្វីដែលសំខាន់គឺ FSB អះអាងថាខ្លួនមានព័ស្តុតាងដែលទីក្រុងវ៉ាសូវី បានប្រើប្រាស់កូនប្រុសរបស់ Korba ដែលមានសញ្ជាតិប៉ូឡូញ ឲ្យទៅជួយភ្នាក់ងារចារកម្មអ៊ុយក្រែន SBU ដើម្បីជ្រើសរើសខ្មាន់កាំភ្លើង។ មកទល់ពេលនេះ មិនទាន់មានប្រតិកម្មអ្វីពីប្រទេសប៉ូឡូញនៅឡើយទេ។

យោងតាម FSB, ជនសង្ស័យវ័យ៦៥ឆ្នាំ បានចូលរៀនវគ្គបាញ់កាំភ្លើង មុនពេលធ្វើដំណើរទៅកាន់ទីក្រុងមូស្គូ តាមរយៈប្រទេសម៉ុលដាវី និងហ្សកហ្ស៊ី។ ភ្នាក់ងារពិសេសអ៊ុយក្រែន បានសន្យាផ្តល់ប្រាក់ឲ្យគាត់ ៣០ ០០០ ដុល្លារអាមេរិក សម្រាប់ការសម្លាប់សមាជិកជាន់ខ្ពស់នៃភ្នាក់ងារស៊ើបការណ៍សម្ងាត់យោធារុស្ស៊ី។

ទោះបីជាយ៉ាងណាក៏ដោយ រុស្ស៊ីមិនបានបញ្ចេញព័ត៌មានលម្អិតអំពីករណីនេះទេ ព្រោះការស៊ើបអង្កេត កំពុងធ្វើឡើងជាបន្ត។

សូមជម្រាបថា លោក Alekseyev ជា អនុប្រធានទី១ នៃទីភ្នាក់ងារស៊ើបការណ៍សម្ងាត់យោធារុស្ស៊ី ជាតួអង្គដ៏មានឥទ្ធិពលបំផុតម្នាក់នៅក្នុងប្រតិបត្តិការសឹករបស់រុស្ស៊ីនៅអ៊ុយក្រែន និងជាអ្នកគ្រប់គ្រងយុទ្ធសាស្ត្រស៊ើបការណ៍សម្ងាត់សំខាន់ៗ។

FSB ប្រកាសថា ពួកគេបានរារាំងផែនការធ្វើឃាតគាត់ទាន់ពេលវេលា ដោយចាប់ខ្លួនលោក Korba និងបក្សពួកម្នាក់ទៀតឈ្មោះ Viktor Vasin ដែលជាអ្នកផ្តល់ទីស្នាក់អាស្រ័យក្នុងក្រុងមូស្គូ៕

អត្ថបទ៖ សុខ សុវណ្ណ