មនុស្សរាប់ម៉ឺននាក់ ធ្វើបាតុកម្មប្រឆាំងរដ្ឋាភិបាលឆែក សហភាពអឺរ៉ុប និងណាតូ រឿងតម្លៃថាមពល

មនុស្សប្រមាណ ៧០,០០០ នាក់បានធ្វើការតវ៉ានៅទីក្រុង Prague ប្រឆាំងនឹងរដ្ឋាភិបាលសាធារណរដ្ឋឆែកកាលពីថ្ងៃសៅរ៍ ដោយអំពាវនាវឲ្យក្រុមចម្រុះដែលកំពុងកាន់អំណាចធ្វើការងារបន្ថែមទៀតដើម្បីគ្រប់គ្រងតម្លៃថាមពលដែលកំពុងកើនឡើង ជាពិសេសប្រឆាំងនឹងសហភាពអឺរ៉ុប និងអង្គការណាតូ ។

អ្នករៀបចំបាតុកម្មមកពីក្រុមនយោបាយស្តាំនិយម និងជ្រុលនិយមមួយចំនួន រួមទាំងបក្សកុម្មុយនិស្ត បាននិយាយថា ប្រជាជាតិអឺរ៉ុបកណ្តាលគួរតែមានអព្យាក្រឹតផ្នែកយោធា និងធានាកិច្ចសន្យាដោយផ្ទាល់ជាមួយអ្នកផ្គត់ផ្គង់ឧស្ម័ន រួមទាំងរុស្ស៊ីផងដែរ ។

អ្នករៀបចំព្រឹត្តិការណ៍ Jiri Havel បានប្រាប់គេហទំព័រព័ត៌មាន iDNES.cz ថា “គោលបំណងនៃបាតុកម្មរបស់យើងគឺដើម្បីទាមទារឲ្យមានការផ្លាស់ប្តូរនៅក្នុងការដោះស្រាយបញ្ហាតម្លៃថាមពល ជាពិសេសអគ្គិសនី និងឧស្ម័ន ដែលនឹងបំផ្លាញសេដ្ឋកិច្ចរបស់យើងក្នុងរដូវស្លឹកឈើជ្រុះនេះ” ។

ការតវ៉ានៅទីលាន Wenceslas កណ្តាលទីក្រុង Prague ត្រូវបានធ្វើឡើងមួយថ្ងៃ បន្ទាប់ពីរដ្ឋាភិបាលបានរួចផុតពីការបោះឆ្នោតមិនទុកចិត្ត ចំពេលក្រុមប្រឆាំងទាមទារភាពអសកម្មប្រឆាំងនឹងអតិផរណា និងតម្លៃថាមពល ។

ការបោះឆ្នោតនេះបានបង្ហាញពីរបៀបដែលវិបត្តិថាមពលរបស់អឺរ៉ុបកំពុងជំរុញឲ្យមានអស្ថិរភាពនយោបាយ ខណៈដែលតម្លៃថាមពលកើនឡើងបានបង្កឲ្យមានអតិផរណា ដែលស្ថិតក្នុងកម្រិតដែលមិនធ្លាប់ឃើញក្នុងរយៈពេល ៣ទសវត្សរ៍កន្លងមកនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ សម្ព័ន្ធមិត្ត ពូទីន ថា លោកខាងលិចកំពុង “លេងអុកមរណៈ” ជាមួយ រុស្ស៊ី