រដ្ឋមន្ត្រីក្រសួងការងារ ថៃ ជិះយន្តហោះទៅចរចាជាមួយ ហ្វាំងឡង់ ឱ្យជួលកម្មករបេះផ្លែឈើ

ថ្ងៃទី៦ ខែកញ្ញា ឆ្នាំ២០២២នេះ រដ្ឋមន្ត្រីក្រសួងការងារថៃ លោក សូឆាត ឈុំក្លីន បានដឹកនាំគណៈប្រតិភូថៃទៅបំពេញទស្សនកិច្ចនៅសាធារណរដ្ឋហ្វាំងឡង់ និងបានជួបពិភាក្សាការងារនៅស្ថានទូតថៃប្រចាំនៅទីក្រុង Helsinki ប្រទេសហ្វាំងឡង់លើបញ្ហាសំខាន់ៗដូចជា៖ លើកទឹកចិត្តពលករថៃដែលមកធ្វើការងារបេះផ្លែឈើនៅប្រទេសហ្វាំងឡង់ មានកិច្ចសន្យាការងារជាមួយនិយោជក និងត្រូវបានទទួលការការពារ អត្ថប្រយោជន៍ និងសុខុមាលភាពតាមផ្លូវច្បាប់ បន្តគាំទ្រកិច្ចសហប្រតិបត្តិការរវាងស្ថានទូតថៃប្រចាំនៅទីក្រុង Helsinki និងក្រសួងការងារថៃជាបន្តបន្ទាប់។

ទន្ទឹមគ្នានេះ តាមរយៈយន្តការក្រុមការងាររួមគ្នា បានលើកទឹកចិត្តឱ្យពលករថៃដែលទៅធ្វើការនៅប្រទេសហ្វាំងឡង់បានទទួលការការពារ និងសុខុមាលភាពស្របច្បាប់ ទាំងកម្មករជំនាញ និងកម្មករបេះផ្លែឈើតាមរដូវកាល។ ជំរុញពលករថៃឱ្យទៅធ្វើការនៅហ្វាំងឡង់បន្ថែមទៀត ដើម្បីពង្រីកទីផ្សារការងារថៃនៅហ្វាំងឡង់ និងមានក្រុមការងាររវាងស្ថានទូតថៃប្រចាំនៅទីក្រុង Helsinki និងក្រសួងការងារក្នុងការគ្រប់គ្រង និងសម្របសម្រួលពលករថៃនៅប្រទេសហ្វាំងឡង់។

លោក សូឆាត ឈុំក្លីន បានបន្តថា ប្រទេសថៃបានត្រៀមខ្លួនរួចជាស្រេច និងមានសក្តានុពលក្នុងការបញ្ជូនពលករជំនាញទៅប្រទេសហ្វាំងឡង់រួចហើយក្នុងឆ្នាំ២០២១ និងឆ្នាំ២០២២។ ក្រសួងការងារបានបញ្ជូនពលករថៃទៅធ្វើការនៅប្រទេសហ្វាំងឡង់សរុបចំនួន ៧,៩០២នាក់ ពួកគេភាគច្រើនជាក្រុមកសិករ អ្នកបេះផ្លែឈើ កម្មករកសិដ្ឋាន អ្នកថែសួន និងចុងភៅ។ សម្រាប់ចុងភៅម្ហូបថៃ ក្នុងមួយឆ្នាំៗពួកគេទាំងនោះអាចបង្កើតប្រាក់ចំណូលចូលប្រទេសវិញមិនតិចជាង ៧០០លានបាតនោះទេក្នុងមួយឆ្នាំ៕

ប្រែសម្រួល៖ គង់ សំអាន

ប្រភព៖ naewna

ចុចអាន៖ អតីតមេដឹកនាំក្រុមអាវក្រហម ឲ្យតាមដានតុលាការធម្មនុញ្ញលើការសម្រេច​តំណែង ៨ ឆ្នាំរបស់លោក ប្រាយុទ្ធ