បាតុករប្រឆាំងលោក ប្រាយុទ្ធ ប្រមូលផ្ដុំគ្នាស្លៀកពាក់ពណ៌ខ្មៅ ទាមទារ​បណ្ដេញនាយករដ្ឋមន្ត្រី

ក្រុមបាតុករប្រឆាំងលោក ប្រាយុទ្ធ ចាន់អូចា ដែលដឹកនាំដោយលោក Sombat Boonngarm-anong កាលពីថ្ងៃអាទិត្យបានចាប់ផ្តើមយុទ្ធនាការប្រមូលផ្ដុំតវ៉ាស្លៀកពាក់ពណ៌ខ្មៅ ទាមទារឲ្យមានការបណ្តេញលោកនាយករដ្ឋមន្ត្រីរូបនេះចេញពីតំណែង ។

នៅក្នុងការប្រមូលផ្ដុំតវ៉ានោះ ក្រុមបាតុករក៏បាននាំគ្នាបិទស្ទីគ័រដែលសរសេរថា “ចេញទៅ ប្រាយុទ្ធ” លើជញ្ជាំងមួយកន្លែងនៅមុខរោងភាពយន្ត Scala ក្នុងសង្កាត់ Pathumwan នៃទីក្រុងបាងកក ។

សកម្មជននយោបាយដ៏ល្បីរូបនេះបានប្រាប់ប្រព័ន្ធផ្សព្វផ្សាយថា ពួកគេនឹងធ្វើសកម្មភាព “ថ្ងៃអាទិត្យពណ៌ខ្មៅ ឬ Black Sunday” ដើម្បីសម្តែងការជំទាស់នឹងសេចក្តីសម្រេចរបស់តុលាការធម្មនុញ្ញដែលឲ្យលោកនាយករដ្ឋមន្ត្រី ប្រាយុទ្ធ អាចបន្តកាន់តំណែង ពីព្រោះអាណត្តិ ​៨ ​ឆ្នាំ​របស់​លោក​មិន​ទាន់​ចប់​នៅ​ឡើយ​ទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក​ថា អ្នក​ចូល​រួម​នឹង​ស្លៀក​ពាក់​ពណ៌​ខ្មៅ ហើយ​សកម្មភាព​របស់​ពួក​គេ​នឹងបត់បែនតាមកាលៈទេសៈនៅរៀង​រាល់​ថ្ងៃ​អាទិត្យ ស្រប​តាម​ស្ថានភាព​នយោបាយក្នុងប្រទេស ។

ទោះជាយ៉ាងនេះក្តី លោកបានសន្យាថា ក្រុមបាតុកររបស់ពួកគេនឹងមិនដើរតាមដងផ្លូវនោះទេ ប៉ុន្តែនឹងធ្វើសកម្មភាពនៅលើចិញ្ចើមផ្លូវ ដើម្បីចៀសវាងជម្លោះជាមួយសកម្មជននយោបាយដ៏ល្បីម្នាក់ទៀតគឺលោក Srisuwan Janya ដែលបានគំរាមចាត់វិធានការផ្លូវច្បាប់ចំពោះក្រុមបាតុករណាដែលធ្វើបាតុកម្មតាមដងផ្លូវ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖​ សំណុំរឿងទាំង ៥ ដែលតុលាការធម្មនុញ្ញ ថៃ គាំទ្រអាណត្តិលោក ប្រាយុទ្ធ មិនទាន់ផុត