ចក្រភពអង់គ្លេស បញ្ជូននាវាចម្បាំង ទៅសមុទ្រខាងជើង (មានវីដេអូ)

ចក្រភពអង់គ្លេស បានបញ្ជូននាវាចម្បាំងទៅកាន់សមុទ្រខាងជើង ដើម្បីការពារបំពង់បង្ហូរឧស្ម័ននិងប្រេងក្រោមទឹក រួមទាំងខ្សែកាបអ៊ីនធឺណិតពីការបំផ្លិចបំផ្លាញដោយរុស្ស៊ី បន្ទាប់ពីបំពង់ Nordstream ត្រូវបានបំផ្ទុះ នៅក្នុងការវាយប្រហារដែលគេសង្ស័យថា ជាស្នាដៃរបស់វិមានក្រឹមឡាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវាចម្បាំងប្រភេទ២៣ ឈ្មោះ HMS Somerset និងនាវាស្ទង់ភូមិសាស្រ្ត HMS Enterprise ត្រូវបានដាក់ពង្រាយចំពេលមានការព្រួយបារម្ភថា បំពង់បង្ហូរប្រេង អណ្តូងរ៉ែ និងខ្សែកាបក្រោមសមុទ្រ ដែលបណ្តាប្រទេសនានារួមទាំងចក្រភពអង់គ្លេស បានពឹងផ្អែកលើនោះ កំពុងជួបហានិភ័យនៃការវាយប្រហារបន្ថែមទៀត។

រដ្ឋមន្ត្ក្រីក្រសួងការពារជាតិអង់គ្លេសលោក Ben Wallace បានធ្វើសកម្មភាពបែបនេះដើម្បីធានាដល់អ្នកដែលធ្វើការនៅជិតបំពង់បង្ហូរប្រេង បន្ទាប់ពីភ្នាក់ងារចារកម្មលោកខាងលិច មានមន្ទិលសង្ស័យ ដោយសារតែការបំផ្ទុះបំពង់បង្ហូរប្រេង។

នាវា HMS Enterprise គឺប្រើប្រាស់ប្រព័ន្ធសូណា និងដ្រូនខ្នាតតូច ដើម្បីធ្វើការស្ទាបស្ទង់ដែនមហាសមុទ្រ និងជលសាស្ត្រ ហើយពិនិត្យ និងគូសផែនទីបាតសមុទ្រ។

ទន្ទឹមនឹងនោះ HMS Somerset គឺជានាវាចម្បាំងដែលមានល្បឿនលឿន អាចសម្របខ្លួននិងបត់បែនបាន។ ពីមុន នាវានេះត្រូវបានដាក់ពង្រាយ ដើម្បីតាមដាននាវាពិឃាដរបស់កងទ័ពជើងទឹករុស្ស៊ី ឆ្លងកាត់ដែនទឹកចក្រភពអង់គ្លេស។

ការដាក់ពង្រាយនេះកើតឡើង នៅពេលដែលហេដ្ឋារចនាសម្ព័ន្ធដ៏សំខាន់របស់អឺរ៉ុប កំពុងស្ថិតក្នុងហានិភ័យ បន្ទាប់ពីបំពង់បង្ហូរឧស្ម័ន Nord Stream ត្រូវបានបំផ្ទុះនៅក្នុងការវាយប្រហារដែលគេគិតថា រៀបចំឡើងដោយរុស្ស៊ី។

ប្រទេសន័រវេស ក៏ត្រូវបានគេរាយការណ៍ថា កំពុងបង្កើនវត្តមានសន្តិសុខរបស់ខ្លួន នៅជុំវិញបំពង់បង្ហូរប្រេងផងដែរ បន្ទាប់ពីមានការគំរាមកំហែងដល់ បំពង់ឧស្ម័ននៅឯឆ្នេរសមុទ្ររបស់ខ្លួន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ អង់គ្លេស ថា រុស្ស៊ី កុហក អំពី ចំនួន ទាហាន ចូលរួម ក្នុង សមយុទ្ធ យោធា