រុស្ស៊ី បង្ហាញលក្ខខណ្ឌ ២ សម្រាប់បន្តកិច្ចចរចាសន្តិភាពនៅ អ៊ុយក្រែន

អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីពេលថ្មីៗនេះថា យើងមានលក្ខខណ្ឌចាំបាច់ចំនួន ២ បន្ថែមទៀតដើម្បីបន្តកិច្ចចរចាសន្តិភាពរវាងរុស្ស៊ី និងអ៊ុយក្រែន ។

លោក Peskov បានប្រាប់អ្នកយកព័ត៌មាននៅក្នុងសន្និសីទសារព័ត៌មាននៅទីក្រុងមូស្គូថា “ដើម្បីបន្តកិច្ចចរចារសន្តិភាពមួយនេះ យើងនឹងរង់ចាំការផ្លាស់ប្តូរជំហររបស់ប្រធានាធិបតីបច្ចុប្បន្នរបស់អ៊ុយក្រែន ឬមេដឹកនាំថ្មីក្នុងពេលអនាគតរបស់អ៊ុយក្រែន” ។

ការអះអាងរបស់វិមានក្រឹមឡាំងបានកើតឡើង បន្ទាប់ពីប្រធានាធិបតីអ៊ុយក្រែនលោក Volodymyr Zelensky បានចុះហត្ថលេខាលើក្រឹត្យមួយដែលបដិសេធមិនធ្វើការចរចាជាមួយប្រធានាធិបតីរុស្ស៊ីលោក Vladimir Putin កាលពីថ្ងៃអង្គារកន្លងទៅ ។

ទន្ទឹមនោះលោក Peskov ក៏បានរំឭកដែរថា មុនពេលចាប់ផ្តើម “ប្រតិបត្តិការយោធាពិសេស” របស់ខ្លួន រុស្ស៊ីក៏បានព្យាយាមដោះស្រាយការទូតជាមួយអ៊ុយក្រែនផងដែរ ប៉ុន្តែមិនបានឃើញអាកប្បកិរិយាឆ្លើយតបដ៏សមស្របណាមួយរបស់អ៊ុយក្រែននោះទេ ។

ជាចុងក្រោយលោកបានបន្ថែមថា ការសម្រេចបានសន្តិភាពនៅអ៊ុយក្រែនគឺមិនអាចទៅរួចទេ បើគ្មានកិច្ចព្រមព្រៀងរបស់ទីក្រុងកៀវចំពោះលក្ខខណ្ឌខាងលើរបស់ទីក្រុងមូស្គូ ដែលរួមមានស្ថានភាពអព្យាក្រឹតរបស់អ៊ុយក្រែន និងការបដិសេធមិនចូលជាសមាជិកភាពអង្កការណាតូជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី មិនឆ្លើយឆ្លងរឿងថាបាញ់នុយក្លេអ៊ែរឬអត់