ក្រុមប្រទេស G7 ប្តេជ្ញាគាំទ្រ អ៊ុយក្រែន រហូតតាមដែលត្រូវការ (មានវីដេអូ)

កាលពីថ្ងៃអង្គារទី១១ខែតុលា ក្រុមប្រទេសទាំងប្រាំពីរ (G7) បានប្តេជ្ញាគាំទ្រអ៊ុយក្រែន រហូតដរាបណានៅតែត្រូវការ បន្ទាប់ពីការអំពាវនាវរបស់មេដឹកនាំថា ការប្រើប្រាស់អាវុធនុយក្លេអ៊ែរណាមួយរបស់រុស្ស៊ី នឹងត្រូវជួបប្រទះផលវិបាកធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍រួមបាននិយាយថា “យើងនឹងបន្តផ្តល់ជំនួយផ្នែកហិរញ្ញវត្ថុ មនុស្សធម៌ យោធា ការទូត និងផ្លូវច្បាប់ ហើយនឹងឈរយ៉ាងរឹងមាំជាមួយអ៊ុយក្រែន ដរាបណាពួកគេត្រូវការ។ យើង​សូម​ធានា​ដល់លោក​ប្រធានាធិបតី Zelensky ថា ​យើង​មិន​ស្ទាក់ស្ទើរនិងរួញរា ​ក្នុង​ការ​ផ្តល់​ការ​គាំទ្រ​ដែល​អ៊ុយក្រែន​ត្រូវ​ការ​ ដើម្បី​រក្សា​អធិបតេយ្យភាព និង​បូរណភាព​ទឹកដី​របស់​ខ្លួននោះទេ”។

សេចក្តីថ្លែងការណ៍នេះ បានថ្កោលទោសការវាយប្រហារដោយមីស៊ីលរបស់រុស្ស៊ី នាពេលថ្មីៗលើអ៊ុយក្រែន ដោយកត់សម្គាល់ថា ការវាយប្រហារលើប្រជាជនស៊ីវិល បានបង្កើតជាឧក្រិដ្ឋកម្មសង្គ្រាម។ យើងនឹងឲ្យលោកប្រធានាធិបតី ពូទីន និងអ្នកពាក់ព័ន្ធ ទទួលខុសត្រូវ”។

ស្របពេលជាមួយគ្នានោះ មេដឹកនាំ G7 ក៏បានរិះគន់ វោហាសាស្ត្រនុយក្លេអ៊ែរ ដែលគ្មានភាពទទួលខុសត្រូវរបស់រុស្ស៊ីផងដែរ។

យោងតាមសេចក្តីថ្លែងការណ៍, “យើងមិនពេញចិត្តចំពោះចេតនាបង្កភាពតានតឹងរបស់រុស្ស៊ីទេ រួមទាំងការកែនទាហានបម្រុង និងវោហាសាស្ត្រនុយក្លេអ៊ែរគ្មានទំនួលខុសត្រូវ ដែលកំពុងធ្វើឲ្យសន្តិភាព និងសន្តិសុខពិភពលោកប្រឈមនឹងហានិភ័យផងដែរ។ យើងសូមបញ្ជាក់សាជាថ្មីថា ការប្រើប្រាស់អាវុធគីមី ជីវសាស្ត្រ ឬនុយក្លេអ៊ែរណាមួយដោយរុស្ស៊ី នឹងត្រូវប្រឈមនឹងផលវិបាកធ្ងន់ធ្ងរ”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ក្រោយបាញ់មីស៊ីលស្រោចលើអ៊ុយក្រែន, រុស្ស៊ី ព្រមានលោកខាងលិច កុំលូកដៃឲ្យសោះ!