ដឹងទេ មីស៊ីលដែល រុស្ស៊ី បាញ់ទៅទីក្រុង អ៊ុយក្រែន ហោះកាត់ប្រទេសណា?

រដ្ឋមន្ត្រីការបរទេសម៉ុលដាវីលោក Nicu Popescu បាននិយាយថា មីស៊ីលដែលរុស្ស៊ីបាញ់សំដៅទៅលើទីក្រុងនានារបស់អ៊ុយក្រែន បានហោះឆ្លងកាត់ដែនអាកាសរបស់ប្រទេសខ្លួន ។

លោក Popescu បាននិយាយនៅលើបណ្ដាញ Twitter កាលពីថ្ងៃអង្គារថា “កាំជ្រួចមីស៊ីលនាំផ្លូវចំនួន ៣ គ្រាប់ដែលត្រូវបានបាញ់បង្ហោះទៅលើទឹកដីអ៊ុយក្រែនពីនាវារុស្ស៊ីនៅក្នុងសមុទ្រខ្មៅ បានហោះឆ្លងកាត់ដែនអាកាសរបស់ប្រទេសម៉ុលដាវី ហើយខ្ញុំបានណែនាំឲ្យកោះហៅឯកអគ្គរដ្ឋទូតរុស្ស៊ីដើម្បីផ្តល់ការពន្យល់ផងដែរ” ។

ទន្ទឹមនោះ លោក Popescu ក៏បានសម្តែងការខឹងសម្បារចំពោះការវាយប្រហារដោយកាំជ្រួចមីស៊ីលជាច្រើនគ្រាប់ដែលបានធ្វើឡើងលើទីក្រុងនានារបស់អ៊ុយក្រែនកាលពីថ្ងៃចន្ទ ពោលប៉ុន្មានថ្ងៃប៉ុណ្ណោះ បន្ទាប់ពីទីក្រុងមូស្គូបានស្តីបន្ទោសអ៊ុយក្រែនចំពោះការផ្ទុះនៅលើស្ពានតភ្ជាប់តំបន់គ្រីមៀទៅកាន់ប្រទេសរុស្ស៊ី ។

ដូចអ៊ុយក្រែនដែរ ប្រទេសម៉ុលដាវីគឺជាអតីតផ្នែកមួយនៃសហភាពសូវៀត ដែលមានរដ្ឋាភិបាលនិយមលោកខាងលិច ហើយជនភៀសខ្លួនអ៊ុយក្រែនរាប់សែននាក់បានជម្លៀសចូលប្រទេសនេះ ចាប់តាំងពីរុស្ស៊ីបានបញ្ជូនកងទ័ពចូលទៅក្នុងប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ មកដឹងទំហំទឹកប្រាក់ដែល រុស្ស៊ី ចំណាយបាញ់មីស៊ីលលើទីក្រុង អ៊ុយក្រែន