តើមេដឹកនាំកំពូលៗលើពិភពលោករូបណាខ្លះឆ្លងកូវីដក្នុងឆ្នាំ ២០២០ នេះ?

ចាប់តាំងពីជំងឺកូវីដ ១៩ ដែលជារោគរាតត្បាតជាសកលកើតមានឡើងកាលពីចុងឆ្នាំ ២០១៩ យើងឃើញថាករណីឆ្លង និងការស្លាប់ដោយសារវីរុសនេះមិនមានការថមថយនោះទេ ហើយក្នុងនោះប្រមុខដឹកនាំកំពូលៗលើពិភពលោកក៏ទទួលរងនូវការឆ្លងជំងឺនេះផងដែរ ។

កម្ពុជាថ្មី សូមនាំលោកអ្នកមកដឹងពីមេដឹកនាំកំពូលៗលើពិភពលោក ៤ រូបដែលបានធ្វើតេស្តវិជ្ជមានជំងឺកូវីដ ១៩ ក្នុងឆ្នាំ ២០២០ នេះ ៖

លោក Emmanuel Macron

វិមាន Elysee បានប្រកាសថា លោកប្រធានាធិបតីបារាំង Emmanuel Macron បានឆ្លងជំងឺកូវីដ ១៩ កាលពីថ្ងៃព្រហស្បតិ៍ ទី១៧ ខែធ្នូ ហើយបានធ្វើចត្តាឡីស័ករយៈពេល ៧ ថ្ងៃ និងបន្តធ្វើការ និងអនុវត្តសកម្មភាពរបស់គាត់ពីចម្ងាយ ។

លោក Donald Trump

លោកប្រធាធិបតីអាមេរិក Donald Trump បានប្រកាសលើបណ្ដាញ Twitter កាលពីថ្ងៃសុក្រ ទី ២ ខែតុលា ថា លោកបានធ្វើតេស្តវិជ្ជមានជំងឺកូវីដ ១៩ រួមជាមួយនឹងជំទាវទីមួយលោកស្រី Melania Trump មុនពេលបោះឆ្នោតប្រធានាធិបតីនៅថ្ងៃទី ៣ ខែវិច្ឆិកា ឆ្នាំ ២០២០ ។

លោក Boris Johnson

លោកនាយករដ្ឋមន្ត្រីអង់គ្លេស Boris Johnson បានឆ្លងរោគរាតត្បាតកូវីដ ១៩ កាលពីចុងខែមីនា ហើយបានធ្វើចត្តាឡីស័ក និងទទួលការដាក់អុកស៊ីសែនរហូតដល់លោកជាសះស្បើយ ។

លោក Jair Bolsonaro

លោកប្រធានាធិបតីប្រេស៊ីល Jair Bolsonaro បានធ្វើតេស្តវិជ្ជមានកូវីដ ១៩ កាលពីខែកក្កដា បន្ទាប់ពីមើលងាយវីរុសនេះរយៈពេលជាច្រើនខែ ហើយបានចាត់ទុកវីរុសកូរ៉ូណាជាជំងឺផ្ដាសាយធម្មតា ។

គួរបញ្ជាក់ថា គិតត្រឹមពេលនេះនៅលើពិភពលោកមានករណីឆ្លងជំងឺកូវីដ ១៩ ចំនួន ៨៣,១៣៥,១៨០ ករណី និងមានអ្នកស្លាប់ចំនួន នាក់ ហើយសហរដ្ឋអាមេរិកនៅតែជាប្រទេសដែលរងគ្រោះខ្លាំងជាងគេដោយសាររោគរាតត្បាតជាសកលមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ The Wire