ចិន​ បញ្ជាក់លក្ខខណ្ឌ ២ ចំណុច ដែលខ្លួននឹងប្រើកម្លាំងយោធា ជុំវិញបញ្ហា កោះតៃវ៉ាន់

លោក Sun Yeli អ្នកនាំពាក្យសមាជជាតិលើកទី២០ នៃគណបក្សកុម្មុយនិស្តចិន បាននិយាយកាលពីថ្ងៃសៅរ៍ទី១៥ខែតុលាថា ប្រទេសចិន មិនប្រើប្រាស់កម្លាំងដើម្បីដោះស្រាយបញ្ហាតៃវ៉ាន់នោះទេ ប៉ុន្តែនឹងប្រើដើម្បីប្រឆាំងនឹងអ្នកគាំទ្រឯករាជ្យភាពរបស់កោះនេះ និងការជ្រៀតជ្រែកពីប្រទេសទីបីប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sun បាននិយាយនៅក្នុងសន្និសីទសារព័ត៌មានមួយថា “យើងមិនសន្យាថានឹងបោះបង់ចោលការប្រើប្រាស់កម្លាំងទេ ហើយនឹងចាត់វិធានការចាំបាច់ទាំងអស់ ប្រឆាំងនឹងការជ្រៀតជ្រែករបស់កងកម្លាំងខាងក្រៅ និងកងកម្លាំងបំបែកខ្លួនឯករាជ្យដែលគាំទ្រតៃវ៉ាន់ និងសកម្មភាពបំបែកខ្លួនរបស់ពួកគេ”។

យោងតាមអ្នកនាំពាក្យ, សកម្មភាពរបស់ចិន នឹងមិនត្រូវបានកំណត់ទៅលើប្រជាជនតៃវ៉ាន់ឡើយ ព្រោះគោលដៅរបស់ទីក្រុងប៉េកាំង គឺត្រូវជំរុញដំណើរការនៃការបង្រួបបង្រួមកោះនេះដោយសន្តិវិធីជាមួយចិនដីគោក។

លោកបានសង្កត់ធ្ងន់ថា “ការបង្រួបបង្រួមដោយសន្តិភាព គឺស្ថិតនៅក្នុងផលប្រយោជន៍របស់ប្រទេសចិន និងជាជម្រើសទី១សម្រាប់បញ្ហាតៃវ៉ាន់។ យើងនឹងប្រឹងប្រែងឲ្យអស់ពីសមត្ថភាព ដើម្បីសម្រេចបាននូវការបង្រួបបង្រួមដោយសន្តិវិធី។ ទោះបីជាមានលទ្ធភាពតិចតួចបំផុតនៃការបង្រួបបង្រួមបែបនេះក៏ដោយ ប៉ុន្តែយើងនឹងអនុវត្តវាដល់ទីបញ្ចប់”។

អ្នកនាំពាក្យរូបនេះបានគូសបញ្ជាក់ថា ដំណោះស្រាយយោធាចំពោះបញ្ហានេះ គឺជាមធ្យោបាយចុងក្រោយ ហើយចោទប្រកាន់ អ្នកបំបែកខ្លួនតៃវ៉ាន់ ពីបទបង្ករឿង និងកងកម្លាំងខាងក្រៅ ពីបទ ប្រើប្រាស់កោះតៃវ៉ាន់ដើម្បីទប់ស្កាត់ប្រទេសចិន៕

ប្រែសម្រួល៖ Vann Vann

ប្រភព៖ Sputnik

ចុចអាន៖ តៃវ៉ាន់ ថា ចិន កំពុង សម្លឹង មើល សង្រ្គាម អ៊ុយក្រែន ដើម្បី អភិវឌ្ឍ យុទ្ធសាស្ត្រ “កូនកាត់”