បារាំង កំពុងខ្វះថ្នាំបំបាត់គ្រុនក្ដៅ Doliprane និង Efferalgan

ក្រៅពីកង្វះប្រេងឥន្ធនៈ បច្ចុប្បន្នប្រទេសបារាំងក៏កំពុង​ប្រឈម​នឹង​ការ​ខ្វះខាត​ថ្នាំ​ពេទ្យ​ដែរ ខណៈការផ្គត់ផ្គង់ថ្នាំបំបាត់ការឈឺចុកចាប់ និងគ្រុនក្ដៅ Doliprane និង Efferalgan បានដាច់ស្តុកតាំងពីខែកក្កដាមកម្ល៉េះ ស្របពេលដែលរលកនៃជំងឺនៅរដូវរងាជិតមកដល់ហើយ ។

ដោយដកស្រង់ប្រភពពីទីភ្នាក់ងារជាតិសម្រាប់សុវត្ថិភាពឱសថ (ANSM), កាសែត Daily Le Parisien បានរាយការណ៍ថា អ្នកជំនាញផ្នែកសុខភាពបានចេញវេជ្ជបញ្ជាឲ្យប្រើថ្នាំទាំងនេះតិចជាងមុន ។

ស្របពេលជាមួយគ្នានេះ ឱសថការីត្រូវកំណត់ការចែកចាយថ្នាំ Doliprane និង Efferalgan ត្រឹម ២ ប្រអប់ប៉ុណ្ណោះសម្រាប់អ្នកជំងឺម្នាក់ នៅពេលដែលមិនមានវេជ្ជបញ្ជា ប៉ុន្តែពួកគេត្រូវផ្តល់អាទិភាពសម្រាប់ការចែកចាយលើសចំនួនដល់អ្នកជំងឺធ្ងន់ធ្ងរ ហើយចុងក្រោយគឺកំណត់ការលក់ថ្នាំប៉ារ៉ាសេតាមុលតាមអនឡាញ ។

ទន្ទឹមនោះ ANSM ក៏បានស្នើសុំវេជ្ជបណ្ឌិតមិនឲ្យចេញវេជ្ជបញ្ជាឲ្យប្រើថ្នាំបំបាត់ការឈឺចាប់ដូចជា ប៉ារ៉ាសេតាមុល ដល់អ្នកជំងឺដែលអាការស្រាលផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី បញ្ជូនឥន្ធនៈនុយក្លេអ៊ែរទៅប្រទេសមួយនៅអាស៊ី