ត្រឹម២ថ្ងៃ ជនជាតិវៀតណាម ជាង៨០០នាក់ ចាកចេញពីកម្ពុជា វិលត្រលប់ទៅប្រទេសវិញ

ក្នុងរយៈពេលត្រឹម២ថ្ងៃ ពលករ​វៀតណាម​ជាង ៨០០​នាក់ ​បានចាកចេញពីកម្ពុជា​ វិល​ត្រលប់​ទៅ​ប្រទេសរបស់ពួកគេវិញ​ តាម​ច្រក​ព្រំដែន​ក្នុង​ខេត្ត​ Tay Ninh ភាគ​ខាង​ត្បូង​ចាប់​តាំង​ពី​ថ្ងៃ​អង្គារទី២៥ខែតុលាមក។

លោក Le Hong Vuong ប្រធាន​កង​កម្លាំង​ការពារ​ព្រំដែន Tay Ninh បាន​ថ្លែង​កាល​ពី​ថ្ងៃ​ព្រហស្បតិ៍​ទី២៧ខែតុលាថា ចំនួន​ពលករដែល​ចេញពីកម្ពុជា​ ត្រលប់​ទៅ ​វៀតណាម វិញ បាន​កើន​ឡើង​យ៉ាង​ខ្លាំង។

លោកបន្ថែមថា ពួកគេភាគច្រើនធ្វើការនៅកាស៊ីណូក្នុងប្រទេសកម្ពុជា ហើយមិនមានឯកសារស្របច្បាប់។ លោកបន្តថា ការវិលត្រឡប់របស់ពលរដ្ឋវៀតណាមចេញពីកម្ពុជា គឺដោយសារតែការបង្រ្កាបរបស់អាជ្ញាធរកម្ពុជា លើក្រុមហ៊ុនដែលកេងប្រវ័ញ្ចពលករខុសច្បាប់ គ្មានឯកសារ។

ច្រកព្រំដែនកម្ពុជា-វៀតណាម ដែលស្ថិតនៅក្នុងខេត្ត Tay Ninh, Long An និង An Giang កំពុងទទួលពលរដ្ឋវៀតណាមត្រលប់ពីកម្ពុជាវិញ ក្នុងចំនួនយ៉ាងច្រើន ដែលក្នុងនោះមួយចំនួនធំ ត្រូវបានជួយសង្គ្រោះពីកាស៊ីណូ និងអាជីវកម្មផ្សេងទៀត។ ពួក​គេ​ភាគ​ច្រើន​ត្រូវ​បាន​គេ​បោក​បញ្ឆោត​ឲ្យ​ចូល​ប្រទេស​កម្ពុជា ធ្វើ​ជា​ពលករ​ខុស​ច្បាប់។

តាម​ការ​ប៉ាន់​ស្មាន​ថា ចាប់​តាំង​ពី​ដើម​ឆ្នាំ​នេះមក ពលរដ្ឋ​វៀតណាម​ប្រមាណ ១៥០០ នាក់​បានវិលត្រលប់ទៅផ្ទះ ចេញ​ពី​កន្លែង​ធ្វើ​ការ​ខុស​ច្បាប់​នៅ​កម្ពុជា៕

ប្រែសម្រួល៖ Vann Vann

ប្រភព៖ VN Express

ចុចអាន៖ ជំងឺអាថ៌កំបាំង សម្លាប់សិស្សសាលាវៀតណាមម្នាក់ ខណៈជាង ៧០០នាក់ធ្លាក់ខ្លួនឈឺ