ក្រុមប្រឹក្សាសន្តិសុខ UN ឲ្យ រុស្ស៊ី បើកច្រកនាំចេញគ្រាប់ធញ្ញជាតិ អ៊ុយក្រែន តាមសមុទ្រខ្មៅឡើងវិញ

សមាជិកក្រុមប្រឹក្សាសន្តិសុខអង្គការសហប្រជាជាតិ (UN) បានបើកការប្រជុំបន្ទាន់ ជំរុញឲ្យរុស្ស៊ីត្រលប់ទៅរកកិច្ចព្រមព្រៀងដែលអនុញ្ញាតឲ្យអ៊ុយក្រែននាំចេញគ្រាប់ធញ្ញជាតិតាមសមុទ្រខ្មៅឡើងវិញ ។

ពាក់ព័ន្ធនឹងបញ្ហានេះដែរ ឯកអគ្គរដ្ឋទូតប្រចាំអង្គការសហប្រជាជាតិរបស់រុស្សី លោក Vassily Nebenzia អះអាងថា ចំពោះការផ្អាកសកម្មភាពនេះ គឺដោយសារតែកងនាវាចរនៅសមុទ្រខ្មៅរបស់ខ្លួន ត្រូវបានវាយប្រហារដោយយន្តហោះគ្មានមនុស្សបើក (ដ្រូន) របស់អ៊ុយក្រែនកាលពីថ្ងៃសៅរ៍សប្តាហ៍មុន ខណៈដែលកងនាវារុស្ស៊ី កំពុងរក្សាសុវត្ថិភាពនៃ “ច្រករបៀងគ្រាប់ធញ្ញជាតិនៅសមុទ្រខ្មៅ” ។

ទន្ទឹមនោះ លោក Nebenzia ក៏ចោទប្រកាន់អ៊ុយក្រែនទៀតថា បានរំលោភលើកិច្ចព្រមព្រៀងគ្រាប់ធញ្ញជាតិនៅសមុទ្រខ្មៅ ដូចនេះ រុស្ស៊ីត្រូវផ្អាកការចូលរួមដោយគ្មានដែនកំណត់ ព្រោះវាមិនអាចធានាសុវត្ថិភាពរបស់នាវាស៊ីវិលបានឡើយ ។

ទោះបីជាយ៉ាងណាក៏ដោយ អ្នកសម្របសម្រួលផ្នែកសង្គ្រោះបន្ទាន់របស់អង្គការសហប្រជាជាតិ លោក Martin Griffiths ប្រាប់អ្នកចូលរួមក្នុងកិច្ចប្រជុំនោះថា ការលើកឡើងរបស់រុស្ស៊ីគឺមិនពិតនោះទេ ពោលមិនមាននាវាណាមួយនៅច្រករបៀងឡើយ នៅយប់ដែលមានការវាយប្រហារកើតឡើង ។

ចំពោះការបញ្ឈប់ជាឯកតោភាគីនៃកិច្ចព្រមព្រៀងនេះ ធ្វើឲ្យឯកអគ្គរដ្ឋទូតអាមេរិក និងអឺរ៉ុបបានថ្កោលទោសរុស្ស៊ីជាខ្លាំង ។ ជាមួយគ្នានោះ ឯកអគ្គរដ្ឋទូតបារាំងលោក Nicolas de Riviere បាននិយាយថា ទីក្រុងមូស្គូ គឺមានចេតនាធ្វើការបញ្ឈប់កិច្ចព្រមព្រៀងនេះ ដើម្បីប្រើប្រាស់ភាពអត់ឃ្លាន ជាមធ្យោបាយនៃសម្ពាធ និងជាអាវុធនៃសង្គ្រាម ។

ដោយឡែក បេសកជនអាហ្រ្វិកក៏បានសង្កត់ធ្ងន់ដែរថា គំនិតផ្តួចផ្តើមគ្រាប់ធញ្ញជាតិ គឺចាំបាច់ជាខ្លាំងដើម្បីការពារវិបត្តិស្បៀងអាហារពិភពលោក ខណៈឯកអគ្គរដ្ឋទូតរបស់កេនយ៉ាលោក Martin Kimani និយាយថា ការផ្អាកកិច្ចព្រមព្រៀងនេះ នឹងធ្វើឲ្យជីវិតមនុស្សជាច្រើនលាននាក់ដែលមិនពាក់ព័ន្ធជាមួយសង្គ្រាម ប៉ះពាល់ធ្ងន់ធ្ងរ ដោយសារវិបត្តិកង្វះស្បៀងអាហារ ៕

ប្រែសម្រួលដោយ៖ នាង រតនៈ

ប្រភព ៖ NHK

ចុចអាន ៖ អង់គ្លេស ព្រមាន រុស្ស៊ី ថា នឹងជួបផលវិបាកធ្ងន់ធ្ងរ បើហ៊ានប្រើនុយក្លេអ៊ែរនៅ អ៊ុយក្រែន