កម្រ! លោក គីម ជុងអ៊ុន នាំទាំងភរិយា និងកូនស្រី មើលការបាញ់មីស៊ីល​ម្សិលមិញ

រូបថតថ្មីដែលចេញផ្សាយដោយប្រព័ន្ធផ្សព្វផ្សាយរដ្ឋរបស់កូរ៉េខាងជើងបានបង្ហាញពីលោក គីម ជុងអ៊ុន នាំទាំងប្រពន្ធ និងកូនស្រីពិនិត្យមើលទីតាំងនៃការបាញ់បង្ហោះមីស៊ីលផ្លោងអន្តរទ្វីប (ICBM) កាលពីថ្ងៃសុក្រ ។

លោក គីម បានដំណើរទៅកាន់កន្លែងបាញ់បង្ហោះមីស៊ីលផ្លោងអន្តរទ្វីប (ICBM) ជាមួយកូនស្រី និងភរិយារបស់លោក បន្ទាប់ពីផ្សព្វផ្សាយជាច្រើនលើកឡើងថា លោក គីម អាក់ខានបញ្ចេញសកម្មភាពជាសាធារណរយៈពេល ៣០ ថ្ងៃជាប់ៗគ្នាហើយ ។

កូរ៉េខាងជើងកាលពីថ្ងៃសុក្របានប្រកាសពីការជោគជ័យនូវការបាញ់សាកល្បងមីស៊ីលផ្លោងអន្តរទ្វីប Hwasong-17 ក្រោមការត្រួតពិនិត្យផ្ទាល់ពីលោក គីម ហើយមីស៊ីលនេះបានធ្លាក់ក្នុងសមុទ្រនៅចម្ងាយប្រហែល ២១០ គីឡូម៉ែត្រ ភាគខាងលិចកោះហុកកៃដូ ។

យោងតាមយោធាកូរ៉េខាងត្បូងបានឲ្យដឹងថា មីស៊ីលដែលបាញ់កាលពីថ្ងៃសុក្រនោះ បានឈានដល់រយៈកម្ពស់ ៦,១០០ គីឡូម៉ែត្រនៅលើគន្លងដ៏ខ្ពស់មួយ ហើយធ្វើដំណើរបានចម្ងាយ ១,០០០ គីឡូម៉ែត្រ ពោលមីស៊ីលនេះអាចហោះដល់ដីគោករបស់សហរដ្ឋអាមេរិក ។

គួរបញ្ជាក់ថា ការបាញ់មីស៊ីលជាបន្តបន្ទាប់របស់កូរ៉េខាងជើង កើតឡើងជាការឆ្លើយតបទៅនឹងការធ្វើសមយុទ្ធយោធារួមគ្នារបស់កូរ៉េខាងត្បូង និងសហរដ្ឋអាមេរិក ក៏ដូចជាគំរាមផ្នែកយោធាដ៏ខ្លាំងក្លាចំពោះកិច្ចខិតខំប្រឹងប្រែងរបស់អាមេរិកក្នុងការបង្កើនវត្តមានសន្តិសុខរបស់ខ្លួននៅក្នុងតំបន់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ដឹងទេ ត្រឹមពាក់កណ្ដាលខែវិច្ឆិកានេះ កូរ៉េខាងជើង បាញ់មីស៊ីលប៉ុន្មានគ្រាប់​ហើយ?