ស្តេចស៊ុលតង់ព្រុយណេ បើកព្រះទីនាំងរថយន្ត ដឹកនាយករដ្ឋមន្រ្តីម៉ាឡេស៊ី បង្កការភ្ញាក់ផ្អើល

ស្តេចស៊ុលតង់ Hassanal Bolkiah នៃប្រទេសព្រុយណេ បានបង្កការភ្ញាក់ផ្អើលជាថ្មីម្តងទៀត ដោយលើកនេះ ទ្រង់យាងបើកព្រះទីនាំងរថយន្ត ដឹកនាយករដ្ឋមន្រ្តីម៉ាឡេស៊ី Anwar Ibrahim ទៅកាន់វិមាន Seri Perdana ក្នុងអំឡុងពេលដែលព្រះអង្គ បំពេញព្រះរាជទស្សនកិច្ចពិសេស ក្នុងប្រទេសម៉ាឡេស៊ីនៅថ្ងៃចន្ទទី ២៨ខែវិច្ឆិកានេះ។

លោក Anwar ដែលអង្គុយនៅកៅអីខាងមុខនៃរថយន្តប្រណីត ត្រូវបានគេឃើញ បក់ដៃទៅកាន់អ្នកសារព័ត៌មាននៅម៉ោងប្រហែល ១១:៤៥នាទីព្រឹក។

ព្រះអង្គម្ចាស់ Abdul Mateen Bolkiah ដែលជាបុត្រារបស់ស្តេចស៊ុលតង់ ក៏មានវត្តមានក្នុងព្រះទីនាំងនោះផងដែរ។

រថយន្ត BMW បានធ្វើដំណើរទៅកាន់វិមានផ្លូវការរបស់នាយករដ្ឋមន្ត្រីក្នុងទីក្រុង Putrajaya ចេញពីមូលដ្ឋានទ័ពអាកាសម៉ាឡេស៊ី ដែលមានចម្ងាយពីគ្នាប្រហែល៤១គីឡូម៉ែត្រ។

នេះគឺ​ជា​ជំនួប​លើក​ដំបូង​របស់​ស្តេច​ស៊ុលតង់ព្រុយណេ ​ជាមួយ​លោក Anwar បន្ទាប់ពីគាត់ ​ស្បថ​ចូល​កាន់​តំណែង​ជា​នាយក​រដ្ឋមន្ត្រី​ទី ១០ របស់​ម៉ាឡេស៊ី។

គួរបញ្ជាក់ថា ដំណើរព្រះរាជទស្សនកិច្ចលើកចុងក្រោយរបស់ស្តេចស៊ុលតង់ ទៅកាន់ទីក្រុងគូឡាឡាំពួ គឺចាប់ពីថ្ងៃទី ៤ ដល់ថ្ងៃទី ៦ខែមីនា ឆ្នាំ២០១៩ ដើម្បីចូលរួមកិច្ចប្រជុំថ្នាក់ដឹកនាំប្រចាំឆ្នាំលើកទី ២២ រវាងម៉ាឡេស៊ី និងព្រុយណេ។

ព្រុយណេ គឺជាដៃគូពាណិជ្ជកម្មធំលំដាប់ទី៣០របស់ម៉ាឡេស៊ី និងធំលំដាប់ទី៦ក្នុងអាស៊ាន ជាមួយនឹងទំហំពាណិជ្ជកម្មសរុប ១.៩៤ពាន់លានដុល្លារអាមេរិក ក្នុងឆ្នាំ២០២១៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក Anwar Ibrahim ក្លាយជានាយករដ្ឋមន្ត្រី ម៉ាឡេស៊ី