លោក Anwar Ibrahim ក្លាយជានាយករដ្ឋមន្ត្រី ម៉ាឡេស៊ី

មេដឹកនាំគណបក្សប្រឆាំងម៉ាឡេស៊ី លោក Anwar Ibrahim ត្រូវបានតែងតាំងជានាយករដ្ឋមន្ត្រីនៅថ្ងៃព្រហស្បតិ៍ទី២៤ខែវិច្ឆិកានេះ ហើយនឹងស្បថចូលកាន់តំណែងនៅម៉ោង៥ល្ងាចនេះ។

ព្រះបរមរាជវាំងបានប្រកាសនៅក្នុងសេចក្តីថ្លែងការណ៍មួយថា ព្រះមហាក្សត្រ បានធ្វើសេចក្តីសម្រេចបន្ទាប់ពីជួបជាមួយអ្នកគ្រប់គ្រងផ្សេងទៀត នៅក្នុងកិច្ចប្រជុំពិសេសមួយ។

ការបោះឆ្នោតសកលកាលពីថ្ងៃសៅរ៍សប្តាហ៍មុន បានបញ្ចប់ទៅដោយសម្ព័ន្ធភាពធំៗទាំង២ ដែលមួយដឹកនាំដោយលោក Anwar និងមួយទៀតដឹកនាំដោយអតីតនាយករដ្ឋមន្ត្រី Muhyiddin Yassin មិនអាចទទួលបានអាសនៈគ្រប់គ្រាន់នៅក្នុងសភា ដើម្បីបង្កើតរដ្ឋាភិបាលមួយបានទេ។

លោក Anwar អាយុ៧៥ឆ្នាំ បានជួបឧបសគ្គម្តងហើយម្តងទៀត ក្នុងការឡើងទៅកាន់តំណែងជានាយករដ្ឋមន្ត្រី នារយៈពេលជាច្រើនឆ្នាំកន្លងមកនេះ។

គួរបញ្ជាក់ថា លោក Anwar ត្រូវបានបណ្តេញចេញពីតំណែងជាឧបនាយករដ្ឋមន្ត្រីក្នុងឆ្នាំ១៩៩៨ ចំពេលមានការចោទប្រកាន់ដ៏ចម្រូងចម្រាសអំពីការរួមភេទជាមួយបុរសដូចគ្នា និងការរំលោភបំពានអំណាច៕

ប្រែសម្រួល៖ Vann Vann

ប្រភព៖ Reuters, Straits Times

ចុចអាន៖ ម៉ាឡេស៊ី ប្រកាស រំលាយសភា