អាមេរិកបារម្ភថា ចិន​ ទំនង​ជា​មាន​ក្បាល​គ្រាប់​នុយក្លេអ៊ែរ​ ១៥០០​គ្រាប់ ត្រឹម​ឆ្នាំ ​២០៣៥

យោងតាមរបាយការណ៍ដែលចេញផ្សាយដោយមន្ទីរបញ្ចកោណកាលពីថ្ងៃអង្គារទី២៩ខែវិច្ឆិកា បានឲ្យដឹងថា ប្រទេសចិនទំនងជានឹងមានឃ្លាំង ស្តុកក្បាលគ្រាប់នុយក្លេអ៊ែរចំនួន ១៥០០ គ្រាប់នៅត្រឹមឆ្នាំ២០៣៥ ប្រសិនបើប្រទេសនេះបន្តបង្កើតនុយក្លេអ៊ែរ ជាមួយនឹងល្បឿនដូចពេលបច្ចុប្បន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួលេខនេះ បានគូសបញ្ជាក់ក្តីព្រួយបារម្ភកាន់តែខ្លាំងរបស់អាមេរិក អំពីចេតនារបស់ចិនសម្រាប់ការពង្រីកឃ្លាំងអាវុធនុយក្លេអ៊ែររបស់ខ្លួន។

មន្ត្រីការពារជាតិអាមេរិកជាន់ខ្ពស់ម្នាក់បាននិយាយក្នុងអំឡុងសន្និសីទសារព័ត៌មានស្តីពីរបាយការណ៍ប្រចាំឆ្នាំរបស់មន្ទីរបញ្ចកោណ ទាក់ទិននឹងយោធាចិនថា “ចិនបានធ្វើការកសាង អ្វីៗដែលជាប្រភេទសំខាន់យ៉ាងឆាប់រហ័ស”។

របាយការណ៍ដែលគ្របដណ្តប់ជាចម្បងលើសកម្មភាពក្នុងឆ្នាំ២០២១ បាននិយាយថា បច្ចុប្បន្ន ប្រទេសចិន មានឃ្លាំងស្តុកក្បាលគ្រាប់នុយក្លេអ៊ែរជាង ៤០០គ្រាប់។

មន្ត្រីដដែលនិយាយថា ការព្យាកររបស់មន្ទីរបញ្ចកោណសម្រាប់ឃ្លាំងអាវុធនុយក្លេអ៊ែររបស់ចិនចំនួន ១០០០ គ្រាប់ត្រឹមឆ្នាំ២០៣០ នៅតែមិនផ្លាស់ប្តូរ ខណៈការព្យាករសម្រាប់ឆ្នាំ ២០៣៥ គឺផ្អែកលើល្បឿននៃការពង្រីក។

ទោះបីជាយ៉ាងណាក៏ដោយ ចិននិយាយថា ឃ្លាំងអាវុធរបស់ខ្លួនគឺតូចជាងសហរដ្ឋអាមេរិក និងរុស្ស៊ី ហើយថា ខ្លួនត្រៀមរួចជាស្រេចសម្រាប់ការសន្ទនា ប៉ុន្តែលុះត្រាតែទីក្រុងវ៉ាស៊ីនតោនកាត់បន្ថយឃ្លាំងអាវុធនុយក្លេអ៊ែរ ដល់កម្រិតដូចចិនជាមុនសិន។

យោងតាមវិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) បានឲ្យដឹងថា សហរដ្ឋអាមេរិកមានឃ្លាំងស្តុកផ្ទុកក្បាលគ្រាប់នុយក្លេអ៊ែរប្រហែល ៣៧០០គ្រាប់ ដែលក្នុងនោះប្រហែល១៧៤០គ្រាប់ត្រូវបានដាក់ពង្រាយ៕

ប្រែសម្រួល៖ Vann Vann

ប្រភព៖ CNA

ចុចអាន៖ ប្រមុខ UN៖ វោហាសាស្ត្រគ្រោះថ្នាក់ កំពុងជំរុញឲ្យមានភាពតានតឹង នុយក្លេអ៊ែរ