អង់គ្លេស អ៊ីតាលី និងជប៉ុនសហការគ្នាផលិតយន្តហោះបំបាំងកាយប្រភេទថ្មី

នាយក​រដ្ឋមន្ត្រី លោក Rishi Sunak បានប្រកាសកាលពីម្សិលមិញនេះថា ចក្រភពអង់គ្លេស អ៊ីតាលី និងជប៉ុន នឹងសហការគ្នាផលិតយន្តហោះចម្បាំងថ្មី ដែលការ​បណ្តាក់​ទុន​រួម​គ្នា​នេះ​មាន​គោល​បំណង​បង្កើត​ការងារ​រាប់​ពាន់​កន្លែង​នៅ​ចក្រភព​អង់គ្លេស និង​ពង្រឹង​ទំនាក់ទំនង​សន្តិសុខរវាងប្រទេសទាំង៣ ក៏ដូចជារក្សាប្រទេសឱ្យមានសុវត្ថិភាពពីការគំរាមកំហែងថ្មីៗ។

លោក Rishi Sunak ថ្លែងថា ប្រជាជាតិនានានឹងបានឃើញការអភិវឌ្ឍយន្តហោះចម្បាំងជំនាន់ក្រោយ Tempest ដែលនឹងបង្ហាញវត្តមាននៅពាក់កណ្តាលទសវត្សរ៍ឆ្នាំ២០៣០ ខណៈយន្តហោះចម្បាំងថ្មីនេះនឹងចូលជំនួសយន្តហោះ Typhoon ។

គេសង្ឃឹមថា យន្តហោះចម្បាំង Tempest នឹងបំពាក់អាវុធនើបៗតាមបច្ចេកវិទ្យាចុងក្រោយបង្អស់ ហើយពេលនេះប្រទេសទាំងបីចាប់ផ្ដើមដំណើរការអភិវឌ្ឍន៍វាហើយ។ ដោយឡែកចំពោះយន្តហោះចម្បាំងប្រភេទថ្មីនេះដែរ គឺជាយន្តហោះបំបាំងកាយល្បឿនលឿន ប្រើប្រាស់ឧបករណ៍ចាប់សញ្ញាកម្រិតខ្ពស់ និងសូម្បីតែបញ្ញាសិប្បនិម្មិត (មិនមានមនុស្សបើក) ដើម្បីជួយសម្រាលដល់អ្នកបើកយន្តហោះ នៅពេលដែលពួកគេស្ថិតក្រោមភាពតានតឹងខ្លាំង។ វាក៏អាចហោះហើរបានដោយគ្មានការបញ្ចូលអ្នកបើក ប្រសិនបើចាំបាច់ ហើយអាចមានសមត្ថភាពបាញ់មីស៊ីលលឿនជាងសំឡេងផងដែរ៕

ប្រែសម្រួល៖ សន្យា

ប្រភព៖ BBC

ចុចអាន៖ អាមេរិក ​ថា រុស្ស៊ី​ កំពុងពង្រីក និងធ្វើទំនើបកម្មឃ្លាំងអាវុធនុយក្លេអ៊ែរ