ព័ត៌មានអន្ដរជាតិ

ផ្ទុះការប៉ះទង្គិចគ្នាដោយហិង្សារវាងអ្នកគាំទ្រ បារាំង និងម៉ារ៉ុក ក្នុងប្រទេសអឺរ៉ុបចំនួន ២

បានផុស

២ years មុន

នៅ

ថ្ងៃព្រហស្បតិ៍ ១៥ ធ្នូ ២០២២

ដោយ

ប្រព័ន្ធផ្សព្វផ្សាយក្នុងស្រុកបានរាយការណ៍ថា ការប៉ះទង្គិចគ្នាដោយហិង្សាបានផ្ទុះឡើងរវាងអ្នកគាំទ្របាល់ទាត់បារាំង និងម៉ារ៉ុកកាលពីថ្ងៃពុធ បន្ទាប់ពីការប្រកួតវគ្គពាក់កណ្តាលផ្តាច់ព្រ័ត្រ FIFA World Cup ឆ្នាំ ២០២២ នៅប្រទេសកាតា ដោយប៉ូលិសបារាំង និងបែលហ្ស៊ិកបានប្រើប្រាស់ឧស្ម័នបង្ហូរទឹកភ្នែក កាណុងបាញ់ទឹក និងឃាត់ខ្លួនអ្នកគាំទ្រមួយចំនួនផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែតបែលហ្ស៊ិក LeSoir បានរាយការណ៍ថា ប៉ូលិសបានប្រើឧស្ម័នបង្ហូរទឹកភ្នែក និងកាណុងបាញ់ទឹក បន្ទាប់ពីអ្នកគាំទ្របាល់ទាត់បានចាប់ផ្តើមគប់ផាវ និងបាញ់កាំជ្រួចដាក់មន្ត្រីប៉ូលិស ទើបធ្វើឲ្យប៉ូលិសចាប់ផ្តើមឃាត់ខ្លួនអ្នកគាំទ្រទាំងនោះ ។

ចំណែកកាសែតបារាំង Le Figaro ក៏បានរាយការណ៍ដែរថា ការប៉ះទង្គិចគ្នាបានផ្ទុះឡើងរវាងអ្នកគាំទ្របារាំង និងម៉ារ៉ុកនៅទីក្រុង Nice របស់ប្រទេសបារាំង បន្ទាប់ពីបុរសពាក់អាវក្រណាត់ចាប់ផ្តើមស្រែកថា “អារ៉ាប់ចេញ” និង “យើងជាម្ចាស់ផ្ទះ” ទៅកាន់អ្នកគាំទ្រម៉ារ៉ុក ហើយក្រោយមកភាគីទាំងពីរចាប់ផ្ដើមគប់ផាវដាក់គ្នា ។

ទន្ទឹមនោះកាសែត Le Monde បានរាយការណ៍ថា ប៉ូលិសបារាំងក៏បានប្រើឧស្ម័នបង្ហូរទឹកភ្នែកផងដែរ ដើម្បីបំបែកហ្វូងអ្នកគាំទ្រនៅក្នុងទីក្រុង Lyon និងទីក្រុង Montpellier ហើយមនុស្សជាង ១០០ នាក់ត្រូវបានឃុំខ្លួន ក្នុងអំឡុងពេលប៉ះទង្គិចគ្នានោះ ។

ដោយឡែកអ្នកឆ្លើយឆ្លងព័ត៌មាន RIA Novosti បានរាយការណ៍ថា ការប៉ះទង្គិចគ្នារវាងប៉ូលិស និងអ្នកគាំទ្រក៏បានផ្ទុះឡើងផងដែរនៅលើមហាវិថី Champs-Elysees ក្នុងរដ្ឋធានីប៉ារីសរបស់ប្រទេសបារាំង ខណៈដំបូងឡើយ អ្នកគាំទ្រកំពុងប្រារព្ធពិធីដោយបាញ់កាំជ្រួច ផាវ និងច្រៀងចម្រៀងធម្មតាប៉ុណ្ណោះ ។

គួរបញ្ជាក់ថា កាលពីថ្ងៃពុធ ក្រុមបាល់ទាត់ជម្រើសជាតិបារាំងបានយកឈ្នះក្រុមម៉ារ៉ុក ២-០ ក្នុងការប្រកួតវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ FIFA World Cup នៅប្រទេសកាតា ហើយនៅថ្ងៃទី ១៨ ខែធ្នូ ក្រុមបារាំងនឹងត្រូវជួបក្រុមអាហ្សង់ទីនក្នុងវគ្គផ្ដាច់ព្រ័ត្រ ខណៈនៅថ្ងៃទី ១៧ ខែធ្នូ, ម៉ារ៉ុក នឹងប្រកួតជាមួយ ក្រូអាត ក្នុងការប្រកួតដណ្តើមយកចំណាត់ថ្នាក់លេខ ៣ ៕