មីយ៉ាន់ម៉ា ដាក់ពន្ធនាគារជនជាតិរ៉ូហ៊ីងយ៉ា ១១២នាក់ ដែលព្យាយាមចាកចេញពីប្រទេស

ប្រទេសមីយ៉ាន់ម៉ា បានដាក់ពន្ធនាគារជនជាតិភាគតិចរ៉ូហ៊ីងយ៉ាចំនួន១១២នាក់ ក្នុងនោះមានកុមារ១២នាក់ បន្ទាប់ពីពួកគេត្រូវបានចាប់ខ្លួន ខណៈប៉ុនប៉ងចាកចេញពីប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានរដ្ឋ Global New Light of Myanmar បានរាយការណ៍នៅថ្ងៃអង្គារទី១០ខែមករានេះថា តុលាការនៅទីក្រុង Bogale ក្នុងតំបន់ Ayeyarwady ភាគខាងត្បូងប្រទេសមីយ៉ាន់ម៉ា បានកាត់ទោសក្រុមនេះកាលពីថ្ងៃទី៦ខែមករា។

របាយការណ៍បន្តថា ក្រុមនេះត្រូវបានចាប់ខ្លួនកាលពីខែធ្នូ បន្ទាប់ពីពួកគេត្រូវបានរកឃើញនៅលើទូកទាំងដែលគ្មានឯកសារផ្លូវការណាមួយ។

ក្នុង​ចំណោម​កុមារ​ទាំង​១២​នាក់ មាន​៥​នាក់​ ​អាយុ​ក្រោម​១៣​ឆ្នាំ ហើយត្រូវបានកាត់ទោសឲ្យ​ជាប់​ពន្ធនាគាររយៈពេល​២​ឆ្នាំ ខណៈកុមារអាយុលើសនេះ ជាប់ពន្ធនាគារ​៣​ឆ្នាំ។ ពួកគេត្រូវបានផ្ទេរទៅសាលាបណ្តុះបណ្តាលយុវជនកាលពីថ្ងៃចន្ទ។ នេះបើយោងតាមកាសែត។

កាសែតដដែល​បន្ថែម​ថា មនុស្ស​ពេញវ័យ​ទាំង​អស់ ​ត្រូវ​ជាប់​ពន្ធនាគារ​រយៈពេល៥ឆ្នាំ​។

គួរបញ្ជាក់ថា ជនមូស្លីមរ៉ូហ៊ីងយ៉ា ត្រូវបានបដិសេធពីភាពជាពលរដ្ឋ និងសិទ្ធិជាមូលដ្ឋានផ្សេងទៀតនៅក្នុងប្រទេសមីយ៉ាន់ម៉ាដែលភាគច្រើនកាន់សាសនាព្រះពុទ្ធ។ មីយ៉ាន់ម៉ា អះអាងថា ពួកគេគឺជា ជនចំណាកស្រុកខុសច្បាប់មកពីអាស៊ីខាងត្បូង។

មនុស្សរាប់សែននាក់ បានភៀសខ្លួនចេញពីមីយ៉ាន់ម៉ា ទៅកាន់ប្រទេសបង់ក្លាដែសនៅជិតខាងក្នុងឆ្នាំ២០១៧ បន្ទាប់ពីការបង្ក្រាបយ៉ាងឃោរឃៅដោយយោធា។

មនុស្សជាច្រើនដែលនៅសេសសល់ក្នុងប្រទេសមីយ៉ាន់ម៉ា ត្រូវបានបង្ខាំងនៅក្នុងជំរំដែលជាកន្លែង សេរីភាពរបស់ពួកគេទទួលរងការរឹតបន្តឹងយ៉ាងធ្ងន់ធ្ងរ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ជន ភៀស ខ្លួន រ៉ូហ៊ីងយ៉ា ប្តឹង Facebook ទារសំណង ១៥០ ប៊ីលាន ដុល្លារ ពី បទ សំដី ស្អប់ខ្ពើម