អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា ដែលកំពុងភៀសខ្លួននៅក្រៅប្រទេស​ប្រកាសនៅលើកម្មវិធីប្រព័ន្ធផ្សព្វផ្សាយសង្គម Clubhouse កាលពីពេលថ្មីៗនេះថា ការវិលត្រឡប់ទៅកាន់ប្រទេសថៃវិញ​ គឺមិនចាំបាចច់មានជំនួយពីគណបក្សភឿថៃ ឬគណបក្ស Palang Pracharath ដែលកំពុងកាន់អំណាចឡើយ ហើយគ្រប់យ៉ាងនឹងប្រកាសដោយកូនស្រីរបស់លោក គឺលោកស្រី Paetongtarn Shinawatra ។

នៅក្នុងបទសម្ភាសន៍ផ្សាយផ្ទាល់ ដែលធ្វើឡើងដោយទំព័រហ្វេសប៊ុក CARE Kid Kluan Thai, ​អ្នកគាំទ្របានសួរលោក ថាក់ស៊ីន ថាតើពេលណាទើបលោកវិលចូលប្រទេសវិញ, លោក ថាក់ស៊ីន ឆ្លើយថា ដោយសារ​តែឆ្នាំមុនគាត់មានជំងឺ ហើយត្រូវបង្ខំដាក់អុកស៊ីសែនព្យាបាលឲ្យជាសះស្បើយមុនបំណាច់ឆ្នាំ ប៉ុន្តែស្ថានភាពនៅតែមានគ្រោះថ្នាក់ ទើបរំខានដល់គម្រោងការវិលទៅថៃវិញ ។

លោកបញ្ជាក់ទៀតថា ទោះជាលោកទៅថៃវិញ ក៏លោកមិនស្វែងរកជំនួយពីគណបក្សនយោបាយណាមួយ រួមទាំងបក្សភឿថៃផងដែរ ។ ដោយឡែក គណបក្ស Palang Pracharath ក៏លោកមិនត្រូវការដែរ លោកអាចជួយខ្លួនឯងបាន ហើយប្រាកដជានឹងត្រឡប់ទៅថៃវិញបាន ។

ការវិលត្រលប់ទៅវិញនេះកើតឡើង ចំពេលមានពាក្យចចាមអារ៉ាមថា គណបក្ស Palang Pracharat និងបក្សភឿថៃ បានធ្វើកិច្ចព្រមព្រៀងសំខាន់មួយសម្រាប់លោក ថាក់ស៊ីន ដើម្បីត្រលប់ទៅប្រទេសថៃវិញ បន្ទាប់ពីការបោះឆ្នោតសកលនៅក្នុងខែឧសភាខាងមុខ ។

ជាមួយគ្នានោះ លោក ថាក់ស៊ីន បានស្នើឲ្យអ្នកគាំទ្ររង់ចាំការប្រកាសរបស់កូនស្រីពៅរបស់គាត់ ដែលនឹងត្រូវបានបង្ហាញជាបេក្ខភាពរបស់គណបក្សភឿថៃសម្រាប់ការបោះឆ្នោតខាងមុខ ។ លោក ថាក់ស៊ីន បាន​បន្ថែម​ថា កូនស្រីលោកនឹង​ប្រកាស​ថា ​ពេល​ណា​ដែលលោក​នឹង​ត្រឡប់​មកប្រទេសថៃវិញ ។

សូមបញ្ជាក់ថា លោក ថាក់ស៊ីន ត្រូវបានយោធាធ្វើរដ្ឋប្រហារទម្លាក់ពីតំណែងកាលពីថ្ងៃទី ១៩ ខែកញ្ញា ឆ្នាំ ២០០៦ ពេលចូលរួមក្នុងកិច្ចប្រជុំអង្គការសហប្រជាជាតិនៅទីក្រុងញូវយ៉ក ។ ក្រោយមកលោកបានត្រលប់មកថៃមួយភ្លែតនៅខែមេសា ឆ្នាំ ២០០៨ មិនបានប៉ុន្មានខែផង លោកបានរត់គេចពីការកាត់ក្តីពុករលួយក្នុងខែសីហា ឆ្នាំដដែល ប៉ុន្តែនៅទីបំផុត លោកក៏ត្រូវបានកាត់ទោសឲ្យជាប់ពន្ធនាគារសរុបរយៈពេល ១០ ឆ្នាំ ៕

ប្រែសម្រួលដោយ ៖ នាង រតនៈ

ប្រភព ៖ The Nation Thailand

ចុចអាន ៖ លោក ប្រាយុទ្ធ សម្ដែងក្ដីរីករាយចំពោះ “ប្រដាល់ Muay Thai” ដែលទទួល​ស្គាល់លើឆាកអន្តរជាតិដោយ អាមេរិក

ចុចអាន ៖ ណាសា បង្កើតម៉ាស៊ីនរ៉ុកកែតដើរដោយនុយក្លេអ៊ែរសម្រាប់នាំមនុស្សទៅភពអង្គារ