អាល្លឺម៉ង់ បញ្ជាក់ពេលវេលា បញ្ជូនរថក្រោះ Leopard 2 ទៅ អ៊ុយក្រែន

រដ្ឋមន្ត្រីការពារជាតិថ្មីរបស់ប្រទេសអាល្លឺម៉ង់លោក Boris Pistorius បានសន្យាថា យោធាអាល្លឺម៉ង់នឹងបញ្ជូនរថក្រោះប្រយុទ្ធដ៏សំខាន់ធុន Leopard 2 ទៅឲ្យអ៊ុយក្រែននៅត្រឹមចុងខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក​បាន​ធ្វើ​សេចក្តី​ថ្លែងការណ៍នេះ​កាល​ពី​ថ្ងៃ​ព្រហស្បតិ៍ទី២៦ខែមករា ខណៈពេល​លោក​​ចុះសួរសុខទុក្ខ​ទាហាន​អាល្លឺម៉ង់​ក្នុង​រដ្ឋ Saxony-Anhalt ភាគ​កណ្តាល។

អំឡុងពេលនោះ អ្នកកាសែតបានសួរលោករដ្ឋមន្ត្រីថាតើលោកមានក្តីព្រួយបារម្ភឬទេថា ការប្រគល់រថក្រោះ Leopard 2 ផលិតដោយអាល្លឺម៉ង់នឹងយឺតពេលសម្រាប់អ៊ុយក្រែន ព្រោះរុស្ស៊ីអាចនឹងរៀបចំផែនការវាយលុកនៅនិទាឃរដូវ?

លោក Pistorius បានឆ្លើយតបថា “ខ្ញុំ​មិន​ជឿ​ថា ​វា​អាច​យឺត​ពេលនោះ​ទេ។ ខ្ញុំគិតថា យើងនឹងប្រគល់ Leopards របស់យើង ប្រហែលជានៅចុងខែមីនា”។

លោកគូសបញ្ជាក់ថា ការផ្គត់ផ្គង់រថក្រោះអាល្លឺម៉ង់ គឺជាវិធានការសំខាន់បំផុត ក្នុងការកែលម្អបូរណភាពការពារជាតិរបស់អ៊ុយក្រែន ដើម្បីឲ្យពួកគេប្រយុទ្ធដោយជោគជ័យ ប្រឆាំងនឹងកងទ័ពរុស្ស៊ី។

ទោះបីជាធ្លាប់បដិសេធនូវលទ្ធភាពបែបនេះអស់រយៈពេលជាច្រើនខែមកហើយក៏ដោយ នៅទីបំផុតប្រទេសអាល្លឺម៉ង់កាលពីថ្ងៃពុធ បានអនុម័តជាផ្លូវការនូវការផ្គត់ផ្គង់រថក្រោះ Leopard 2A6 ចំនួន១៤គ្រឿងទៅឲ្យទីក្រុងកៀវ។ ទីក្រុងបែរឡាំងក៏បាននិយាយដែរថា ខ្លួននឹងអនុញ្ញាតឲ្យប្រទេសផ្សេងទៀត ផ្តល់រថពាសដែកផលិតដោយអាល្លឺម៉ង់ ទៅកាន់អ៊ុយក្រែន។

ការប្រកាសរបស់អាល្លឺម៉ង់ កើតឡើងប៉ុន្មានម៉ោង មុនពេលសហរដ្ឋអាមេរិក យល់ព្រមលើការបញ្ជូនរថក្រោះ M1 Abrams ចំនួន៣១គ្រឿងទៅកាន់អ៊ុយក្រែន៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី បន្ទោសអាល្លឺម៉ង់ ថា ក្បត់ប្រវត្តិសាស្រ្ត និងធ្វើឲ្យជម្លោះនៅអ៊ុយក្រែន កាន់តែរីកធំ