អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា ប្រធានាធិបតីអ៊ុយក្រែន លោក Volodymyr Zelensky ឈប់ធ្វើជាដៃគូសន្ទនាជាមួយប្រធានាធិបតីរុស្ស៊ីលោក Vladimir Putin ជាយូរមកហើយ ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា លោក Zelensky មិនចាប់អារម្មណ៍ក្នុងការជួបជាមួយលោក Putin សម្រាប់កិច្ចចរចាសន្តិភាពណាមួយនោះទេ បើទោះជាជម្លោះអូសបន្លាយពេលជិត ១ ឆ្នាំហើយក៏ដោយ ។

លោក Peskov បាននិយាយថា “យើងដឹងពីអ្វីដែលលោក Zelensky បានសន្យាក្នុងអំឡុងពេលធ្វើយុទ្ធនាការបោះឆ្នោតប្រធានាធិបតីរបស់គាត់ហើយ ជាពិសេសគឺគោលនយោបាយនាំអ៊ុយក្រែនចូលជាសមាជិករបស់អង្គការណាតូជាដើម ។

អ្នកនាំពាក្យវិមានក្រឹមឡាំងរូបនេះបានបញ្ជាក់ទៀតថា លោក Zelensky មិនដែលដោះស្រាយបញ្ហានៅតំបន់ Donbass នោះទេ ។ លើសពីនេះទៅទៀត លោកបានបដិសេធលើកិច្ចព្រមព្រៀងទីក្រុង Minsk ដូច្នេះវាស្ដែងឲ្យច្បាស់ណាស់ថា លោក Zelensky ឈប់ធ្វើជាអ្នកសន្ទនាដ៏មានឥទ្ធិពលសម្រាប់លោកប្រធានាធិបតី Putin ហើយ ។

ពាក់ព័ន្ធនឹងបញ្ហានេះដែរ លោក Zelensky ក៏បានប្រាប់ទូរទស្សន៍ Sky News របស់ចក្រភពអង់គ្លេសកាលពីថ្ងៃព្រហស្បតិ៍ដែរថា លោកមិនចាប់អារម្មណ៍លើកិច្ចចរចាសន្តិភាពជាមួយលោក Putin ឡើយ ព្រោះតែលោក Putin បានក្លាយជាមនុស្សមិនសំខាន់ចំពោះលោក បន្ទាប់ពីរុស្ស៊ីបានចាប់ផ្តើមប្រតិបត្តិការសឹកលើអ៊ុយក្រែនកាលពីខែកុម្ភៈ ឆ្នាំមុនមក ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក Medvedev ថា សត្រូវរបស់ រុស្ស៊ី កំពុងភ្លឺភ្នែក ក្រោយឃើញយើងមាន អាវុធគ្រប់បែបយ៉ាង