លោក Medvedev ថា សត្រូវរបស់ រុស្ស៊ី កំពុងភ្លឺភ្នែក ក្រោយឃើញយើងមាន​អាវុធគ្រប់បែបយ៉ាង

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បាននិយាយថា សត្រូវរបស់រុស្ស៊ីដែលតែងតែតាមដានយ៉ាងដិតដល់ចំពោះការផលិតអាវុធនៅក្នុងប្រទេសរបស់យើង កំពុងភ្លឺភ្នែក និងមានការខកចិត្តយ៉ាងខ្លាំង ក្រោយឃើញរុស្ស៊ីមានសព្វាវុធគ្រប់បែបយ៉ាងជាច្រើន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងរបស់លោក Medvedev បានកើតឡើងកាលពីថ្ងៃអង្គារ នៅក្នុងកិច្ចប្រជុំក្រុមការងារមួយនៅក្រោមគណៈកម្មការឧស្សាហកម្មយោធា ស្តីពីការត្រួតពិនិត្យការផលិតអាវុធ និងយានប្រយុទ្ធសំខាន់ៗនៅឯរោងចក្រ Kalashnikov ក្នុងទីក្រុង Izhevsk ។

លោក Medvedev បានសង្កត់ធ្ងន់ថា “ពេលមកដល់រោងចក្រ យើងបានឃើញយានប្រយុទ្ធ និងសព្វាវុធសំខាន់ៗផ្សេងទៀតសុទ្ធតែផលិតហើយរួចរាល់ ជាពិសេសគឺយន្តហោះដ្រូន ដែលជាតម្រូវការខ្ពស់មួយ ក្នុងអំឡុងប្រតិបត្តិការសឹករបស់រុស្ស៊ីនៅអ៊ុយក្រែន” ។

អតីតប្រធានាធិបតីរុស្ស៊ីរូបនេះបានគូសបញ្ជាក់ថា “អ្នក​រាល់​គ្នា​កំពុង​មើល​រឿង​នេះ ជាពិសេស​បច្ចាមិត្ត​របស់​យើង​ក៏​កំពុង​តាមដានបញ្ហានេះខ្លាំងណាសដែរ ព្រោះកន្លងមក​ពួកគេតែងតែ​អះអាងជាហូរហែថា រុស្ស៊ីខ្វះនេះខ្វះនោះ ហើយឌឺដងយើងឥតឈប់ឈរឡើយ” ។

ជាចុងក្រោយលោក Medvedev និយាយថា “ពីមួយថ្ងៃទៅមួយថ្ងៃ ពួកគេចំអកឲ្យយើងថា មានតែមីស៊ីលប៉ុន្មានទៀតប៉ុណ្ណោះ ពោលមិនគ្រប់គ្រាន់សម្រាប់ការវាយប្រហារក្នុងប្រតិបត្តិការសឹកឡើយ ប៉ុន្តែពេលនេះខ្ញុំចង់ឲ្យពួកគេភ្លឺភ្នែក និងខកចិត្តចំពោះអ្វីដែលយើងមាននៅពេលនេះ គឺរុស្ស៊ីមិនខ្វះសព្វាវុធប្រយុទ្ធឡើយ” ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី កម្ទេចអាវុធ អាមេរិក ផ្ដល់ឲ្យ អ៊ុយក្រែន ដណ្ដើមបានភូមិចំនួន ២ ទៀត