យន្តហោះដឹកអ្នកដំណើរមួយគ្រឿង ដែលហោះចេញពីទីក្រុងឌូបៃ បានហោះហើរអស់រយៈពេល១៣ម៉ោង ប៉ុន្តែត្រូវចុះចតនៅអាកាសយានដ្ឋានដដែលវិញ បន្ទាប់ពីត្រូវបង្ខំចិត្តហោះបកក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជើងហោះហើរ EK448 បានចេញដំណើរនៅម៉ោង ១០:៣០នាទីព្រឹកថ្ងៃសុក្រទី២៧ខែមករា ហើយត្រូវចុះចតនៅទីក្រុង Auckland ក្នុងប្រទេសនូវែលសេឡង់ នៅ១៦ម៉ោងក្រោយ។

ប៉ុន្តែជើងហោះហើររបស់ក្រុមហ៊ុន Emirates បានបានចុះចតក្នុងទីក្រុងឌូបៃដដែល នៅពាក់កណ្តាលអធ្រាត្រថ្ងៃសៅរ៍ ដោយសារតែទឹកជំនន់ធ្ងន់ធ្ងរនៅអាកាសយានដ្ឋាន Auckland។

ស្ថានភាពគ្រាអាសន្ន ត្រូវបានប្រកាសនៅក្នុងទីក្រុង Auckland បន្ទាប់ពីភ្លៀងធ្លាក់ក្នុងកម្រិតខ្ពស់ បានវាយប្រហារខ្លាំងក្លា ហើយបង្កឲ្យមានភាពចលាចលដល់មជ្ឈមណ្ឌលដឹកជញ្ជូន។

អាកាសយានដ្ឋានបាននិយាយនៅលើ Twitter ថា “អាកាសយានដ្ឋាន Auckland បាននិងកំពុងវាយតម្លៃអំពីការខូចខាតដល់ស្ថានីយអន្តរជាតិរបស់យើង ហើយជាអកុសល យើងកំណត់ថា គ្មានជើងហោះហើរអន្តរជាតិណាមួយ អាចដំណើរការបានទេនៅថ្ងៃនេះ។ យើងដឹងថា នេះគឺជាការខកចិត្តយ៉ាងខ្លាំង ប៉ុន្តែសុវត្ថិភាពរបស់អ្នកដំណើរ គឺជាអាទិភាពចម្បងរបស់យើង”។

យ៉ាងហោចណាស់ផ្ទះ និងអាជីវកម្មចំនួន៥០០០ កំពុងត្រូវបានវាយតម្លៃសម្រាប់ការខូចខាតដោយសារទឹកជំនន់ និងការបាក់ដី ហើយផ្លូវជាច្រើននៅតែបិទ។

ភាពអាសន្នសម្រាប់ទីក្រុង Auckland និងសង្កាត់ជុំវិញត្រូវបានដកចេញកាលពីព្រឹកថ្ងៃចន្ទ ប៉ុន្តែអភិបាលក្រុងលោក Wayne Brown បានព្រមានថា ស្ថានភាពគ្រោះថ្នាក់ត្រូវបានព្យាករណ៍ថា នឹងវិលត្រលប់មកវិញនៅថ្ងៃខាងមុខ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្រុមហ៊ុនអាកាសចរណ៍ដដែល ១សប្តាហ៍មានបញ្ហាជាមួយយន្តហោះ៥គ្រឿង