ខួប២ឆ្នាំនៃរដ្ឋប្រហារ៖ អាមេរិក ដាក់ទណ្ឌកម្មថ្មីលើមីយ៉ាន់ម៉ា ខណៈអំពើហិង្សានៅតែបន្ត 

ភាពចលាចលនយោបាយនៅតែបន្តកើតមានក្នុងប្រទេសមីយ៉ាន់ម៉ា ខណៈថ្ងៃពុធនេះ គឺជាខួបពីរឆ្នាំ ចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតតាមបែបប្រជាធិបតេយ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃខួបនេះដែរ សហរដ្ឋអាមេរិកនិយាយថា ខ្លួនបានដាក់ទណ្ឌកម្មលើបុគ្គល និងអង្គភាពនានា ដែលមានទំនាក់ទំនងជាមួយមេដឹកនាំយោធាមីយ៉ាន់ម៉ា។

ក្រសួងរតនាគារសហរដ្ឋអាមេរិក បាននិយាយក្នុងសេចក្តីថ្លែងការណ៍មួយនៅថ្ងៃពុធទី០១ខែកុម្ភៈថា ខ្លួនបានបន្ថែមអង្គភាពចំនួន៣និងបុគ្គល៦នាក់ ទៅក្នុងបញ្ជីទណ្ឌកម្មរបស់ខ្លួន ដោយក្នុងចំណោមវិធានការទាំងអស់ក៏​រួមមាន ​ការ​បង្កក​ទ្រព្យសម្បត្តិផងដែរ​។

យោងតាមសេចក្តីថ្លែងការណ៍ ក្នុងចំណោមអង្គភាពទាំងបី គឺមានទាំងគណៈកម្មការរៀបចំការបោះឆ្នោតគ្រប់គ្រងដោយយោធា ដែលទទួលខុសត្រូវចំពោះការបដិសេធលទ្ធផលនៃការបោះឆ្នោតសកលខែវិច្ឆិកាឆ្នាំ២០២០ផងដែរ។

សេចក្តីថ្លែងការណ៍បន្តថា បុគ្គលទាំងប្រាំមួយរូប រួមមានរដ្ឋមន្ត្រីថាមពលដែលតែងតាំងដោយយោធា និងនាយកប្រតិបត្តិពីរនាក់ នៃក្រុមហ៊ុនគ្រប់គ្រងដោយរដ្ឋ។

សេចក្តីថ្លែងការណ៍បានចង្អុលបង្ហាញថា អ្នកទាំងនេះ បានចូលរួមនៅក្នុងការជួយរដ្ឋាភិបាលយោធាឲ្យទទួលបានប្រាក់ចំណូលជាង១ពាន់លានដុល្លារពីការនាំចេញប្រេង និងឧស្ម័ន។

មិនមែនតែអាមេរិកទេ វិធានការ​នេះ ក៏​ត្រូវ​បាន​ធ្វើ​ឡើងរួមជាមួយ​ចក្រភព​អង់គ្លេស និង​កាណាដាផងដែរ។

គួរបញ្ជាក់ថា យោធាបានធ្វើរដ្ឋប្រហារនៅថ្ងៃទី០១ខែកុម្ភៈឆ្នាំ២០២១ ដោយអះអាងអំពីភាពមិនប្រក្រតីនៅក្នុងការបោះឆ្នោតសកល ដែលគណបក្សសម្ព័ន្ធជាតិដើម្បីលទ្ធិប្រជាធិបតេយ្យ ឬ NLD ដឹកនាំដោយលោកស្រី អ៊ុងសាន ស៊ូជី ទទួលជ័យជម្នះភ្លូកទឹកភ្លូកដី។

យោងតាមក្រុមសិទ្ធិមនុស្សនៅក្នុងប្រទេសមីយ៉ាន់ម៉ា, មនុស្សចំនួន២៩៤០នាក់ ត្រូវបានសម្លាប់ដោយអាជ្ញាធរចាប់តាំងពីការកាន់កាប់ដោយយោធា៕

ប្រែសម្រួល៖ Vann Vann

ប្រភព៖ NHK

ចុចអាន៖ មីយ៉ាន់ម៉ា ត្រូវបានអញ្ជើញឲ្យចូលរួម កិច្ចប្រជុំរដ្ឋមន្ត្រីការពារជាតិអាស៊ានបូក