គិតត្រឹមម៉ោង៣:៣០នាទីរសៀលថ្ងៃចន្ទទី០៦ខែកុម្ភៈ (ពេលវេលានៅកម្ពុជា), គ្រោះរញ្ជួយដីកម្រិត ៧.៨រ៉ិចទ័រ ដែលវាយប្រហារប្រទេសតួកគី និងស៊ីរី បានសម្លាប់មនុស្សដល់ជាង ៦០០នាក់ហើយ និងបង្ករបួសមនុស្សរាប់រយនាក់ទៀត ខណៈអគារជាច្រើន បានដួលរលំពាសពេញតំបន់ ធ្វើឲ្យមនុស្សមួយចំនួនជាប់នៅក្នុងគំនរបាក់បែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយដីនេះ មានចម្ងាយប្រហែល៣២គីឡូម៉ែត្រពីទីក្រុង Gaziantep និងប្រហែល ២៦គីឡូម៉ែត្រពីទីក្រុង Nurdağı នៃប្រទេសតួកគី។

អនុប្រធានាធិបតីតួកគី លោក Fuat Oktay និយាយថា មនុស្ស២៨៤នាក់ត្រូវបានសម្លាប់ និង ២៣២៣នាក់បានរងរបួស ខណៈអាជ្ញាធរបានបញ្ជូនក្រុមជួយសង្គ្រោះ និងផ្គត់ផ្គង់យន្តហោះទៅកាន់តំបន់រងគ្រោះ ព្រមទាំងអំពាវនាវសុំជំនួយពីអន្តរជាតិផងដែរ។

នៅក្នុងប្រទេសស៊ីរី, មន្ត្រីសុខាភិបាលនិយាយថា មនុស្សជាង២៣៧នាក់ត្រូវបានសម្លាប់ និងប្រហែល ៦០០នាក់រងរបួស ភាគច្រើននៅក្នុងខេត្ត Hama, Aleppo និង Latakia ជាកន្លែងដែលអគារជាច្រើនបានដួលរលំ។

លើសពីនេះ មនុស្សយ៉ាងតិច១២០នាក់ ត្រូវបានគេនិយាយថា បាត់បង់ជីវិតនៅក្នុងតំបន់កាន់កាប់ដោយក្រុមឧទ្ទាមរបស់ប្រទេសស៊ីរី ដែលនាំឲ្យចំនួនមនុស្សស្លាប់សរុបពីការរញ្ជួយដីដ៏ធំនេះ កើនដល់៦៤១នាក់។

ប្រធានាធិបតីស៊ីរី លោក Bashar al-Assad បានបើកកិច្ចប្រជុំគណៈរដ្ឋមន្ត្រីជាបន្ទាន់មួយ ដើម្បីពិនិត្យមើលការខូចខាត និងពិភាក្សាអំពីជំហានបន្ទាប់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រញ្ជួយដីខ្លាំងក្លា រង្គើ៦ប្រទេស សម្លាប់មនុស្សជាង ៣០០នាក់