នៅថ្ងៃទី៨ ខែកុម្ភៈនេះ លោក ថាក់ស៊ីន ឈីណាវ៉ាត់ (Thaksin Shinawatra) និងលោកស្រី យីងឡាក់ ឈីណាវ៉ាត់ (Yingluck Shinawatra) អតីតនាយករដ្ឋមន្ត្រីថៃ តាមរយៈបណ្តាញសង្គមហ្វេសប៊ុកផ្ទាល់ខ្លួន បានបង្ហោះសារចូលរួមរំលែកទុក្ខចំពោះសោកនាដកម្មនៃគ្រោះរញ្ជួយដីដ៏ខ្លាំងក្លានៅប្រទេសតួកគី និងស៊ីរី។

លោក ថាក់ស៊ីន ថ្លែងថា៖ “ខ្ញុំសូមចូលរួមរំលែកទុក្ខដ៏ក្រៀមក្រំបំផុតចំពោះប្រជាជននៃប្រទេសតួកគី និងសាធារណរដ្ឋអារ៉ាប់ស៊ីរី ដែលបានស្លាប់បាត់បង់ជីវិត និងរបួសជាច្រើននាក់ពីហេតុការណ៍គ្រោះរញ្ជួយដីដ៏រន្ធត់នេះ។ ខ្ញុំ និងប្រជាជនថៃ សូមចូលរួមរំលែកទុក្ខដ៏ក្រៀមក្រំបំផុត ជាមួយក្រុមគ្រួសារនៃអ្នកស្លាប់ និងរងរបួសក្នុងគ្រាសោកនាដកម្មនេះ ហើយសង្ឃឹមយ៉ាងមុតមាំថា ប្រជាជននៃប្រទេសទាំងពីរនឹងឆ្លងផុតពីគ្រោះធម្មជាតិ និងឆាប់ជាសះស្បើយពីការរងរបួស”។

ចំណែកលោកស្រី យីងឡាក់ ថ្លែងថា៖ “ខ្ញុំពិតជាមានការរន្ធត់ចិត្តយ៉ាងខ្លាំង នៅពេលដែលបានទទួលដំណឹងពីគ្រោះរញ្ជួយដីជាច្រើនលើកនៅក្នុងប្រទេសតួកគី និងសាធារណរដ្ឋអារ៉ាប់ស៊ីរី ដែលបណ្តាលឱ្យមានមនុស្សស្លាប់និងរងរបួសរាប់ពាន់នាក់។ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារនៃអ្នកដែលបានស្លាប់បាត់បង់ជីវិត និងរងរបួស និងបន់ស្រន់ឱ្យប្រជាពលរដ្ឋនៅក្នុងតំបន់ទាំងនោះ ឆ្លងផុតនូវគ្រាដ៏លំបាក និងរួចផុតពីគ្រោះមហន្តរាយទាំងនេះឱ្យបានឆាប់”៕

ប្រែសម្រួល៖ គង់ សំអាន

ប្រភព៖ siamrath

ចុចអាន៖ តួលេខមនុស្សស្លាប់ ក្នុងគ្រោះរញ្ជួយដីនៅ តួកគីនិងស៊ីរី កើនលើស ៩ពាន់នាក់