លោក Zelensky អះអាងថា អ៊ុយក្រែន នឹងបញ្ចប់ប្រតិបត្តិការសឹករបស់ រុស្ស៊ី នៅឆ្នាំនេះ

ប្រធានាធិបតីអ៊ុយក្រែនលោក Volodymyr Zelensky បាននិយាយថា អ៊ុយក្រែនបានប្ដេជ្ញារួចហើយ នឹងបញ្ចប់ប្រតិបត្តិការសឹករបស់រុស្ស៊ីនៅក្នុងឆ្នាំនេះ បន្ទាប់ពីលោកប្រធានាធិបតីអាមេរិក Joe Biden បញ្ចប់ដំណើរទស្សនកិច្ចមកកាន់ទីក្រុងកៀវ ។

លោក Zelensky បានថ្លែងនៅក្នុងវីដេអូដែលបានចេញផ្សាយកាលពីថ្ងៃចន្ទថា “យើងនឹងត្រូវធ្វើអ្វីគ្រប់បែបយ៉ាងដើម្បីបញ្ចប់សង្គ្រាមលុកលុយរបស់រុស្ស៊ីនៅឆ្នាំនេះ ជាពិសេសឲ្យតែយើងមានការប្ដេជ្ញាចិត្តគ្រប់គ្រាន់” ។

ពាក់ព័ន្ធនឹងដំណើរទស្សនកិច្ចរបស់លោក Biden មកកាន់ទីក្រុងកៀវវិញ, លោក Zelensky ក៏បានសម្តែងការដឹងគុណចំពោះប្រធានាធិបតីសហរដ្ឋអាមេរិករូបនេះ ដែលអញ្ជើញមកប្រទេសអ៊ុយក្រែនជាលើកដំបូង ចាប់តាំងពីផ្ទុះប្រតិបត្តិការសឹករបស់រុស្ស៊ីមក ។

លោក Zelensky បានលើកឡើងថា លោកបានឃើញការប្តេជ្ញាចិត្តបែបនេះចំពោះលោកប្រធានាធិបតី Biden ក្នុងអំឡុងពេលដំណើរទស្សនកិច្ចដ៏គួរឲ្យភ្ញាក់ផ្អើលរបស់គាត់ទៅកាន់រដ្ឋធានីអ៊ុយក្រែន ជាពិសេសការប្រកាសសន្យាផ្ដល់កញ្ចប់ជំនួយ ៥០០ លានដុល្លារ ដែលវាពិតជានឹងធ្វើឲ្យអ្នកប្រយុទ្ធជួរមុខរបស់យើងកាន់តែមានទឹកចិត្ត ។

គួរបញ្ជាក់ថា ប្រតិបត្តិការសឹករបស់រុស្ស៊ីនៅអ៊ុយក្រែន នឹងឈានដល់ខួប ១ ឆ្នាំនាថ្ងៃសុក្រ ទី២៤ ខែកុម្ភៈ ឆ្នាំ ២០២៣ នេះ បន្ទាប់ពីលោក ពូទីន ប្រកាសបើកការវាយលុយលើទីក្រុងកៀវកាលពីខែកុម្ភៈ ឆ្នាំ២០២២ ក្រោយមានសំណើសុំជំនួយពីប្រមុខនៃសាធារណរដ្ឋ Donbass ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ្នកការទូតកំពូល ចិន ធ្វើដំណើរទស្សនកិច្ចនៅ រុស្ស៊ី ខណៈលោក Biden ហោះទៅ អ៊ុយក្រែន ដូចគ្នា